Salmib 40 - Quiché Bible

Nu Dios, cakaj chnuwäch ri u banic ri rayibal la

¹ Xincoj ri weyebal c'u'x chrij ri Ajawaxel, ri are' xpachi' ulok che qui tatabexic ri e nu rakoj tak chi'aj;

² xinuto'tajisaj man xinbe ta pa ri mukbal cäminak, xinuto' rech man quinbik'taj ta chupam ri suk. Co xebutac'aba' ri wakan puwi' jun nimalaj abaj; xebuya' qui cowirisabal ri e u xo'l tak wakan.

³ Xubano chi xresaj ulok jun c'ac' bix pa nu chi', jun bix che u k'ijilaxic ri ka Dios. E q'ui aretak xquil wa', xslabetaj ri canima'; xquicu'ba' qui c'u'x chrij ri Ajawaxel.

⁴ ¡Utz re ri winak ri cucu'ba' u c'u'x chrij ri Ajawaxel, ri man quebutzucuj ta ri banal tak nimal mawi ri caquiterenej ri banoj tzij!

⁵ Ajawaxel, xukuje' nu Dios, man quebajilataj ta ri mayibal ri e banom la xukuje' ri u tok'obisaxic tak ka wäch umal la. ¡Man c'o ta cajunamataj ta wi la! Quinwaj ta ne' quinwesaj qui tzijol quinya' ta qui bixic, sibalaj c'u e c'o c'u na chquiwäch ri quincuin che qui tzijoxic.

⁶ Man caquicot ta la cuc' ri tabal tak tok'ob aj awaj aj c'äj, mawi e tz'onon ta la tabal tak tok'ob ri quechajirisaxic, mawi tak sipanic che resaxic ri macaj. E tek'om c'u la ri e nu xiquin.

⁷ Rumal ri' nu bim: In c'olic ri', jacha' ri cubij ri wuj chwij.

⁸ Ri in cäkaj chnuwäch ri u banic ri rayibal la; ¡e nu c'olom ri tijonic la pa ri wanima'!

⁹ Chuwäch ri tinimit la ri man ajilatal taj nu yo'm retamaxic jachique ri suc'. ¡Kas eta'm la, Ajawaxel, chi ma ta ne' nu bim!

¹⁰ Man xintz'apij ta u pa nu chi' ri ma ta xintzijoj ri suq'uil la; nu yo'm u bixic ri jicomal la xukuje' ri colobal ib ri cäya' la. Mawi jubik' nu ch'ukum ri lok'ok'ebal c'u'x la xukuje' ri kastzij la chuwäch ri tinimit la ri man ajilatal taj.

¹¹ Ri lal, Ajawaxel, ¡mak'il ri ch'uch'ujil la chwe! ¡Amak'el taj chinquich'uk ri lok'ok'ebal c'u'x la xukuje' ri kastzij la!

¹² E q'ui c'u tak ri quiäkasakil e nu taklebem ri mawi ne quincuin ta che cajilaxic. In quikajbem ri wetzelal; ¡mawi c'u ne quinca'y chic! C'o na ri qui q'uial chquiwäch ri nu wi', xukuje' ne ri wanima' xtukaric.

¹³ Ajawaxel, bana' la tok'ob ¡chinesaj la pa ri c'ax! Ajawaxel, ¡saj la chanim che nu to'ic!

¹⁴ ¡Chesax ta nimalaj qui q'uixbal ri cäquitzucuj u sachic nu wäch! ¡Chebanimaj ta rumal qui q'uixbal ri cäcaj cäquiban c'ax chwe!

¹⁵ Elinak ta qui q'uixbal quebanimajic ri xak cäquitze'j nu wäch.

¹⁶ Conojel ta c'ut ri cätzucux la cumal chenoj ta che quicotemal; ri caquirayij ri colobal ib ri caya' la chquibij ta amak'el: “¡Nim u k'ij ri Ajawaxel!”

¹⁷ Are c'u ri in, ri in meba' xukuje' in ch'ibatajinak, minel pa jolom la Ajawaxel. Lal ri' ri quinto'w la xukuje' ri quinesaj la pa ri c'ax; ¡mabey ib la, nu Dios!