Salmib 4 - Quiché Bible

Tz'akatalaj jiquibam c'uxaj chrij ri Ajawaxel

¹ Dios, to'l wech, ¡Chinch'abej la aretak quinsiq'uin che la! Ri lal chi chupam ri nu rikoj c'ax xinto' la. ¡Chtok'obisaj la nu wäch chtatabej la ri nu ch'awem!

² Ix ri quina' iwib chi ix nimak tak tatayib. ¿C'ä jampa' quitanaba' u yok'ic ri nu juluwem? ¿C'ä jampa' lo ri quirayij na xukuje' qui tzucuj na ri man c'o ta u beya'l, ri xa subunic?

³ Chiwetamaj chi ri Ajawaxel are cäbe ranima' ruc' ri winak ri jic cäbin chuwäch; chiwetamaj chi ri Ajawaxel quinutatabej aretak quinsiq'uij.

⁴ ¡Chixbirbitok; mixmacun chic! Aretak ix k'oyol chic, pa tz'inelem, chinic'oj ri kas iwetambal c'uxaj;

⁵ chebichi'j jicalaj tak tabal tok'ob chicu'ba' i c'u'x chrij ri Ajawaxel.

⁶ E q'ui quebinic: “¿Jachin ri cac'utuw na chkawäch ri takalic?” ¡Ajawaxel, chujila' la cuc' ri e utzalaj tak bak'wäch la!

⁷ Nim na ri quicotemal ri yo'm la chupam ri wanima' chquiwäch ri c'o q'uialaj qui trico xukuje' u wa'l qui uva ruc' tz'ebenic.

⁸ In quink'oyi' pa jamaril chanim c'ut cäc'amtaj nu waram, lal c'ut Ajawaxel, caban la chwe chi quinjeki' pa cu'bisan c'uxaj.