Salmib 39 - Quiché Bible

Ri c'aslemal man cabeytaj taj

¹ In nu chi'm u chajixic ri nu c'aslemal, man quinmacun ta c'u ruc' ri wak', xukuje' quincoj jun jic'abal u pa chi'aj pa nu chi' aretak quinuc'ulelaj ri banal etzelal.

² Xinban wib chi in mem. Man c'o ta jas xinbij. ¡Mawi ne xintzijoj ta ri utz! Cätajin c'u cänimataj ri nu k'oxom;

³ ¡cätajin c'u canicow ri wanima' cho nu c'u'x! Cätajin quinchomaj wa', xnicow ri k'ak' chnupam, co c'u xinch'awic je xinbij wa':

⁴ “Ajawaxel, bij la chwe jas ri quinc'ulmaj na chuq'uisbal, xukuje' joropa' junab quinec'asal na; ¡quinwaj quinwetamaj chi sibalaj man cabeytaj ta ri nu c'aslemal!

⁵ Yo'm la jun c'aslemal chwe ri xa re quieb oxib k'ij; man nim ta ri nu c'aslemal chwäch la. ¡Ronojel winak xa jun uxlabic cabeytajic!”

⁶ “¡Ronojel winak xak coc'owic xa jacha' jun nanoch'! Man c'o ta cupatanij che cumulij sibalaj k'inomal, man reta'm ta c'ut jachin quechben canok.

⁷ Jeri', Ajawaxel, ¿Jas ta ri quincuinic quinweyej chi na? ¡Ri eyebal nu c'u'x chij la c'o wi!

⁸ Chinesaj la chupam ri nu mac; mäya' la be chque ri man etal ta tzij chi cäquitze'j nu wäch.

⁹ Xinban wib chi in mem, man xinjak ta ri nu chi', lal c'ut ri cätajin cäch'aw la.

¹⁰ Tanaba' la nu ch'ayic; in k'itajinak chi c'u pa ri ch'ayic rumal ri k'ab la.

¹¹ Cuc' c'äjisabal wächaj qui mac ri macaj cajic' la ri winak, rumal ri u c'äjisaxic u wäch u mac ri u mac, cäban la chi cux puc'uc' ulew ri sibalaj culok'ok'ej. Ronojel winak xa jun uxlabic.

¹² Ajawaxel, tatabej la ri nu ch'awem ri quiban chwäch la, ¡chetatabej la ri e nu juyuwem!, ¡xak mail la ri u wa'l nu wäch! Ri in in uxinak che la xa in oc'owel jun chicop ri c'o u xic', e jacha' ri e nu mam.

¹³ Tanaba' la nu ca'yexic, ya' la jok'otaj chwe re uxlabic, c'ä majok chinbec quintanaba' c'u c'aslemal.”