Salmib 38 - Quiché Bible

Ch'awem ruc' Dios che u tz'onoxic ri u to'banic

¹ Ajawaxel, minyaj la chupam ri oyowal la mawi mac'äjisaj la nu wäch chupam ri c'anal la.

² Chwe c'ut xech'iqui' wi ri ch'ab la; ¡panuwi' c'u kajinak wi ri k'ab la!

³ Rumal ri oyowal la qui mac quech ri e nu mac, ronojel ri nu cuerp yawab; ¡man c'o ta jun nu bakil utz!

⁴ Ri wetzelal in qui kajbem; je jas jun alalaj eka'n ri man quinch'ij taj.

⁵ U mac rech chi man in tal ta tzij, ri e nu socotajic quek'ayic, quechuwiric.

⁶ Ronojel ri jun k'ij xak quinbisonic, pachal ri nu jolom in c'o pa c'ax.

⁷ Canicow ri uwo wij rumal ri nimalaj k'ak'; ¡ronojel ri nu cuerp yawab!

⁸ Sibalaj in muchmubinak, man c'o ta chi nu chuk'ab; ¡ri nu ch'ikowem u ch'ikowem ri anima'aj!

⁹ Ajawaxel, eta'm la ronojel ri quinrayij; ¡xukuje' ri e nu bik'bitem man e c'utal ta chwäch la!

¹⁰ Ri wanima' sibalaj cach'opilajic, ri e nu chuk'ab cätajin quinquiwonoba' canok, ¡xukuje' ne ri e nu bak'wäch quesutz'iric!

¹¹ Ri e wachil ri sibalaj e utz na wuc' xukuje' ri e wachalaxic, naj cäquiya' wi quib, naj chque ri e nu ch'a'c.

¹² Ri cäquirayij nu cämisaxic, cäquicoj c'amibal chwe; ri cäquirayij u banic c'ax chwe, cäquitzijoj nu mojcolexic, conojel ri k'ij cäquichomaj jas cäquibano rech quinkaj pa qui k'ab.

¹³ Ri in c'ut quinban wib chi in t'oy, je ta ne ri ma ta quinto je ta ne' ri in mem, man xinjak ta ri nu chi'.

¹⁴ In junam ruc' ri man cätan taj, ri man cäcuin ta c'o jas cubij che u to'ic rib.

¹⁵ In quineyen che la, Ajawaxel xukuje' nu Dios, chi lal cätzelen la u wäch qui tzij.

¹⁶ Xuwi quintz'onoj chi mäquitze'j nu wäch; mäquibixoj ch'äcanic chwij aretak quintzakic.

¹⁷ Kastzij, xa jubik' man quintzakic, ri e nu k'oxom man cäquiya' ta uxlanem chwe.

¹⁸ ¡Quebenk'alajisaj ri nu mac, quinel c'u ch'u'j cumal!

¹⁹ Ri e nu c'ulel e q'ui chic; e q'ui ri man c'o ta jasche cäquetzelaj nu wäch.

²⁰ Etzelal quitojbem wech che u q'uexwäch utzil; quinquic'ulelaj xa rumal chi quintzucuj u banic ri utzil.

²¹ Ajawaxel, ¡minya' la can nu tuquiel! Nu Dios, ¡manajtajisaj ib la chwe!

²² Dios xukuje' nu colonel, ¡saj la chanim che nu to'ic!