Salmib 37 - Quiché Bible

Chacu'ba' a c'u'x chrij ri Ajawaxel

¹ Mäpe awoyowal qui mac quech ri e banal tak etzelal, mawi mebaquiäk rayij ri e banal tak etzelal,

² chanim c'ut quechaki'jaric, jacha' ri echa'; ¡quebach'uyaric jacha' ri k'ayes!

³ Chacu'ba' a c'u'x chrij ri Ajawaxel, chabana' ri utzil, chatc'asal cho ri uwächulew, chätux c'u jic.

⁴ Chalok'ok'ej ri Ajawaxel ruc' ch'uch'ujil, ri are' quebutz'akatisaj c'u na ri a rayibal ri c'o chupam ri awanima'.

⁵ Chajacha' ri a c'aslemal pa u k'ab ri Ajawaxel; chicu'ba' a c'u'x chrij, cäpe c'u na che a to'ic.

⁶ Cuban na chi cäjuluw ri a colomal xukuje' ri a suq'uilal jacha' ri u juluwem ri k'ij pa ri niq'uiaj k'ij.

⁷ Mel jun tzij pa chi' chuwäch ri Ajawaxel; chaweyej ruc' coch'onic c'ä catuto' na. Mäpe awoyowal che ri curik utzil pa ri u c'aslemal, xukuje' ri cuchomaj qui banic etzelal.

⁸ Chaya' can ri oyowal, chatzaka' can ri c'ananem; mäpe awoyowal, wa' xa cunimatajisaj ri jastak.

⁹ Kastzij, ri e banal tak etzelal quebesax na bic pa ri ulew, e are c'ut ri qui cuban qui c'u'x chrij ri Ajawaxel cäquechbej na ri uwächulew.

¹⁰ Pa quieb oxib k'ij man queriktaj ta chi banal tak etzelal; pune' sibalaj quebatzucuj, man quebarik ta chic.

¹¹ E are' tak c'ut ri e mach'alic cäquechbej na ri uwächulew quejeki' na pa tz'akatalaj jamaril.

¹² Ri banal etzelal cuchomaj u banic c'ax che ri utzalaj winak, quebusolcopij u bak'wäch che ruc' nimalaj oyowal.

¹³ Ri Ajawaxel xa cutze'j u wäch reta'm c'ut chi ri banal etzelal cänakajin ri u k'ij.

¹⁴ Ri e banal tak etzelal cäquijosij ri ch'ich' re ch'o'j cäquitanij ri qui q'uiakbal ch'ab che qui kasaxic ri mebayib ri man e nimak ta qui k'ij, ¡che qui cämisaxic ri utz qui c'aslemal!

¹⁵ Are c'u ri qui ch'ich' re ch'o'j cuch'ic na rib puwi' canima', ri e qui q'uiakbal ch'ab quemuchmub na.

¹⁶ Ri jubik' ri c'o ruc' ri utzalaj winak, are utz na chquiwäch ri e q'uia qui k'inomal ri e lawalolaj tak winak.

¹⁷ Ri Ajawaxel cusach c'u na qui wäch ri e lawalo tak winak, e are c'u queruc'aj na ri utzalaj tak winak.

¹⁸ Ri Ajawaxel quebuchajij na ri man c'o ta mac cäriktaj pa qui c'aslemal, ri quechbal cäjeki' na chbe k'ij sak.

¹⁹ Pa c'axalaj tak k'ij, aretak c'o wi'jal, man quel ta na qui q'uixbal, c'o c'u cäquitijo.

²⁰ Ri banal tak etzelal quenicow na jacha' ri chaki'j k'ayes; ri qui banom qui c'ulel che ri Ajawaxel, cäsach na qui wäch jacha' ri sib.

²¹ Ri banal etzelal cutz'onoj jalomal man cätojon ta c'ut, are c'u ri utzalaj winak cätok'obisan wächaj, man xu'y taj.

²² Ri quetewichi'x rumal ri Ajawaxel cäquechbej na ri ulew, are c'u ri quec'okox rumal quebesax na bic chuwäch ri ulew.

²³ Ri Ajawaxel are' cäc'amow u be ri winak cuya' c'u pa ri be ri cäkaj chuwäch are';

²⁴ pune' c'u cätzakic, man cäpoyi ta canok, chaptal c'u rumal ri u k'ab ri Ajawaxel.

²⁵ In xinux can c'ojol, in c'u nim winak chic, mawi c'u jumul xinwil jun utzalaj winak ri wonobam ta canok mawi xebenwil ta ri ralc'ual chi xa ta caquitz'onoj cochinic.

²⁶ Pa conojel jok'otaj quel u c'u'x, cuya' c'u kajomal; ri e ralc'ual e jun tewichibal.

²⁷ Chatasa' awib chrij ri etzelal, chabana' c'u ri utzilal, cärik c'u na jun c'olbal ri catjeki' wi.

²⁸ Ri Ajawaxel cakaj ri suq'uilal chuwäch man c'u quebuwonoba' ta canok ri e jic che; e are' c'u ri e banal tak etzelal cusach na qui wäch man cutas ta can quija'lil.

²⁹ Ri e utzalaj tak winak cäquechbej na ri ulew quejeki' c'u na chuwäch chbe k'ij sak.

³⁰ Ri utzalaj winak ruc' no'j cäch'awic, ri utzalaj winak ruc' suq'uil cäch'awic.

³¹ Ruc'am ri u tijonic ri u Dios pa ri ranima'; mawi jubik' quejiljob ri rakan.

³² Ri banal etzelal cuyuxlej ri utzalaj winak, xa che u cämisaxic.

³³ Man cuya' ta c'u be ri Ajawaxel chi cäkaj pa u k'ab, mawi cuya' be chi cäk'alajisaxic chi ajchak'mac.

³⁴ Chicu'ba' a c'u'x chrij ri Ajawaxel, chatniman c'u che, cunimarisaj c'u na a k'ij, cuya' na ri ulew jacha' che awechbal. Cuc' ri a bak'wäch cawil na ri quesaxic bic ri e banal tak etzelal.

³⁵ Wilom ri banal etzelal nojinak che nimal u lic'om rib jacha' jun jewejic che';

³⁶ man xk'alajin ta c'ut jawije' xbe wi, xsach u wäch, xintzucuj man xinrik ta chic.

³⁷ Chaya' a wäch che ri winak ri tz'akatisanel pa ronojel. Ri man c'o ta macaj chrij: ri curik na we winak ri' are ri jamaril.

³⁸ E are' c'ut ri man e tal ta tzij cäsach na qui wäch conojel; ri caquirik na ri e lawalo are ri u sachisaxic qui wäch.

³⁹ Ri to'bal quib ri e utzalaj tak winak cäpe ruc' ri Ajawaxel, are c'u qui panibal pa ri c'axalaj tak k'ijol.

⁴⁰ Ri Ajawaxel quebuto' che quesaxic quib. Cuban chque chi caquesaj quib pa qui k'ab ri e banal tak etzelal, quebuto'tajisaj c'ut, rumal rech chi ruc' are' xquitzucuj wi ch'ukubal quib.