Salmib 36 - Quiché Bible

Ri retzelal ri winak, xukuje' ri rutzil ri Dios

¹ Ri etzelal cuch'abej ri banal etzelal chupam ri ranima'. Mawi jubik' c'ul ta pa u jolom chi rajawaxic cuxe'j rib chuwäch ri Dios.

² Cuna' rib chi takal che chi cäya' u k'ij, are' c'u pa u c'u'x chi man etzelal ta ri cubano.

³ Itzel tzij u pa u chi' xukuje' banal tzij, xmoxir ri u jolom, man cuban ta chi utzil.

⁴ K'oyol pa ri u ch'at cuchomaj u banic ri man utz taj; sibalaj benak ranima' che u takexic ri itzelalaj u be man cäraj taj cuya' can u banic ri etzelal.

⁵ Are c'u ri lok'ok'ebal c'u'x la, Ajawaxel, copan c'ä chicaj; ri jicomal la curika' ri räxalaj caj.

⁶ Ri suq'uil la cajunamataj cuc' ri nimak tak juyub, ri takanic la junam ruc' ri nimalaj plo ri naj u pam. Ajawaxel, quechajij la ri winak xukuje' ri awaj.

⁷ ¡Sibalaj mayibal ri lok'ok'ebal c'u'x la, nu Dios! Ri winak cäquitzucuj u ch'ukic quib chuxe' ri xic' la.

⁸ Kas quenoj rumal ri wa ri telechi'm pa ri achoch la; ri lal cäya' la jun je'licalaj nima' che cuq'uia',

⁹ uc' la c'o wi ri u q'uiyibal ja' re c'aslemal chupam c'ut ri chäj la cäkil wi ri chäj.

¹⁰ Chya' la amak'el ri lok'ok'ebal c'u'x la xukuje' ri suq'uilal la chque ri queta'm wäch la, chque ri man quieb ta qui c'u'x.

¹¹ Mäya' la be chi chinquixak'alej ri banal tak nimal mawi chinquiyacaya' ri banal tak etzelal.

¹² Chquila' jas qui kajic ri banal tak etzelal, ¡quekajic, rech man quewalij ta chic!