Salmib 35 - Quiché Bible

Ch'awem che u tz'onoxic ri u to'banic ri Ajawaxel

¹ Ajawaxel, walij la chquij ri quewalij che nu c'ulelaxic; k'atij la qui wäch ri cäquik'atij nu wäch.

² C'ama' la ri quetequic ch'ich' la, walij la che nu to'ic;

³ c'ama' la ri tz'imaj ch'ich' la chk'atij la qui wäch ri quincokataj; bij la chwe chi lal ri nu colonel.

⁴ Chebanimajok elinak qui q'uixbal ri cäcaj quinquicämisaj; chebanimajok elinak qui q'uixbal ri cäcaj cäquiban il chwe;

⁵ ¡chebux pajo ri cäc'am bic rumal ri quiakik', ri quejabux bic rumal ri u tako'n ri Ajawaxel!

⁶ ¡Chux k'eku'm ri qui be xukuje' cäjililic, e okatatal c'u rumal ri u tako'n ri Ajawaxel!

⁷ Man c'o ta jasche xquicoj jun c'amibal chwe; man c'o ta jasche xquic'ot jun jul rech quintzak ta chupam.

⁸ ¡Chemajix ta rumal jun quiäkasakil! ¡Chekaj chupam ri qui ca'mibal! ¡Chekaj chupam quiäksakil!

⁹ Xinquicot c'u na rumal ri Ajawaxel, are c'ut ri xinto'tajisanic.

¹⁰ Ruc' ronojel wanima' quinbij na: “¿Jachin ta ri cäjunamataj uc' la, Ajawaxel? Ri mebayib xukuje' ri c'o qui rajawaxic queto' la pa qui k'ab ri c'o na qui chuk'ab chquiwäch, ri quet'orin ri jastak quech.”

¹¹ Quewalij itzel tak k'alajisanelab cäquic'ot nu chi' chquij jastak ri man weta'm taj.

¹² Etzelal quiyo'm chwe che rajil u q'uexel ri utzilal. Sibalaj bisobal wa' chwe.

¹³ Aretak c'u queyawajic, in quebenbisoj, quincoj atz'iak re bis, man quinwa' taj, quintakej c'u ch'awem ruc' Dios pa wanima'.

¹⁴ Quinbisonic, cäbe ri nu plaj, je ta ne ri quinbisoj ri nu nan, jun wachil o jun wachalal.

¹⁵ Aretak c'u xintzakic, conojel junam xquitze'j nu wäch; e jacha' ta ne ri man weta'm ta qui wäch, man c'u xinabej taj, man quebuxlan ta che nu yok'ic.

¹⁶ Xinquic'axc'obisaj, xquitze'j nu wäch, xinquica'yej ruc' nimalaj oyowal.

¹⁷ Ajawaxel, c'ä ¿joropa' k'ijol cätakej na la rilic wa'? ¡To'tajisaj la ri nu c'aslemal, ri xuwi wa' nu c'aslemal, pa qui chi' ri coj ri quewu'nic!

¹⁸ Quinya' maltioxinic che la chuwäch ri tinimit la ri man c'o ta cajilabal; ¡quinya' k'ij la chquiwäch ri q'uialaj winak!

¹⁹ Ma ta quequicot ri nu c'ulel chwe, maquiyuch' qui bak'wäch ri man c'o ta rumal quetzelam nu wäch.

²⁰ We winak ri' man cäquitzucuj ta ri jamaril, xane' cäquiban chomanic che u banic c'ax chque ri winak ri man e yacal ta ch'o'j pa ri tinimit;

²¹ cäquic'ababej ri qui chi' chwij, cäquibij c'ut: “¡Chiwila' ri kilom!”

²² ¡Kas chwäch la c'o wi Ajawaxel! ¡Xak mäcanaj la chi jeri'! ¡Mänajtin la chwe!

²³ Walij la, Ajawaxel xukuje' nu Dios, ¡c'astaj la! Bana' la ri suq'uilal; cojo ib la wuc'.

²⁴ K'ata' la tzij panuwi', Ajawaxel, xukuje' nu Dios, jas ri u cholajil ri k'atan tzij la. ¡Mäquitze'j c'u nu wäch!

²⁵ Mäquichomaj xukuje' mäquibij: “¡Are wa' ri ka rayim! ¡Etzeletajinak kumal!”

²⁶ Chech'ukutaj rumal q'uixbal ri quequicot che ri nu quiäkasakil chech'ukutaj rumal q'uixbal ri cäquina' quib chi nimak qui banic chnuwäch.

²⁷ Chequicot c'ut xukuje' che jajat cuc' rakoj tak chi'aj ri cäcaj quinquilo chiquinch'äcan amak'el; quibij c'u amak'el: “¡Ri Ajawaxel nim u k'ij, cäkaj c'u chuwäch chi utz c'o ri pataninel rech!”

²⁸ Quincoj ri wak' che u k'alajisaxic ri suq'uilal la; ¡quinya' k'ij la, ronojel k'ij quink'ijlan che la!