Salmib 33 - Quiché Bible

K'ijilanic xukuje' maltioxic che ri Ajawaxel

¹ Chitz'onoj tok'ob che ri Ajawaxel, utzalaj tak winak; chquichi' tak ri e utz, je'lic ri k'ijilanic.

² Chiya' maltioxinic che ri Ajawaxel ruc' rok'ebal arp, chebibixoj bix che ruc' rok'ebal nimalaj arp,

³ chibixoj jun c'ac' bix che, ¡utzalaj k'ojomanic chibana' che u k'ijilaxic!

⁴ Ri u tzij ri Ajawaxel kastzij; ri e u chac cäquic'ut ri u jicomal.

⁵ Ri Ajawaxel culok'ok'ej ri suq'uilal xukuje' ri jicomal; ri lok'ok'ebal u c'u'x u nojisam ronojel ri uwächulew.

⁶ Ri caj xukuje' ronojel ri c'o chuwäch are' ri Ajawaxel xbanowic ruc' ri u tzij xukuje' ruc' ri ruxlab ri xel pa u chi'.

⁷ Ri are' cumulij cut'ajij c'u ri ja' re ri nimalaj plo.

⁸ Chiya' u k'ij ri Ajawaxel iwonojel cho ri ulew; ¡chyok u k'ij cumal conojel ri e jekel cho ri uwächulew!

⁹ Aretak c'u xch'awic, ronojel xbantajic; xtakanic, ronojel c'ut co xjeki'.

¹⁰ Ri Ajawaxel cuyojij ronojel ri qui chomanic ri winak ri e k'ijilal tak diosib,

¹¹ are c'u ri u chomanic ri Ajawaxel cäjeki' na chbe k'ij sak.

¹² Utz rech ri tinimit ri are' u Dios ri Ajawaxel, ri tinimit ri u cha'om rech cux rech.

¹³ Ri Ajawaxel cäca'y ulok chicaj queril conojel ri winak;

¹⁴ pa ri c'olbal ri c'o wi quebuca'yej ulok ri winak cho ri uwächulew;

¹⁵ are' xnuc'uw ri canima' xukuje' coc il che rilic ri cäquibano.

¹⁶ Man c'o ta jun ajawinel cäto'taj ta cumal ri q'uialaj e rajch'ojab, mawi queto'taj ri c'o qui chuk'ab rumal ri nimalaj qui chuk'ab;

¹⁷ ri quiej man quecuin ta che u to'ic jun winak; pune' c'o sibalaj qui chuk'ab, man quetoban taj.

¹⁸ Ri Ajawaxel amak'el quebuchajij ri nim quil wi cumal xukuje' ri cu'l qui c'u'x chrij ri lok'ok'ebal u c'u'x,

¹⁹ che quesaxic pa ri cämical cuya' c'u qui c'aslemal pa tak ri k'ijol re wi'jal.

²⁰ Ri uj ka cuban ka c'u'x chrij ri Ajawaxel; ¡ri are' cujuto' xukuje' ka quetequic ch'ich'!

²¹ Ri kanima' caquicot ruc' ri Ajawaxel; kas ka cuban ka c'u'x chrij ri tastalicalaj u bi'.

²² ¡Chujrachilaj ri lok'ok'ebal c'u'x la, Ajawaxel, jacha' ri keye'm che la!