Salmib 32 - Quiché Bible

U k'alajisaxic macaj, u rikic cuyubal macaj

¹ Utz rech ri winak ri e sachtajinak ri e qui chak'maquil xukuje' tak ri e u mac.

² Utz re ri winak ri man c'o ta itzel chomanic pa ranima', ri man cätzujux ta rumal ri Ajawaxel chi c'o u mac.

³ Aretak c'ä maja' quink'alajisaj ri nu mac, ri nu cuerp cätajin cätukaric rumal ri nu ch'ikowem ronojel k'ij,

⁴ chi pa k'ij chi chak'ab ri k'ab la xalob panuwi'. Jacha' ri cotz'i'j ri bach'uyirinak rumal ri u k'ak'al ri sak'ij, are jeri' nu tukaric xinnao'.

⁵ Xink'alajisaj c'ut ri nu mac chwäch la xukuje' ri wetzelal man c'o ta xinc'u' che; xpe pa wanima' qui k'alajisaxic ri e nu mac chwäch la, are c'u ri lal, Ajawaxel, xecuy la.

⁶ Rumal ri' pa tak ri jok'otaj aretak e c'o c'axc'olil ri e jic caquitz'onoj na chi queto' la, pune' quetixtob ulok ri nimak tak ja', man quebopan ta na cuc'.

⁷ Lal ri lal to'l wech; quinch'uk la chuwäch ri xak quieb cubij panuwi', cäsutij la wij cuc' rakoj tak chi'aj re ch'äcanic.

⁸ Ri Ajawaxel cubij: “Ri e nu bak'wäch e c'o pawi'. Quebenya' tijonic chawe, quebenya' a no'j, quinc'ut na ri be chawäch ri caterenej.

⁹ Matjunamataj ruc' ri quiej mawi ruc' ri mula, ri man cäcuin ta quetamanic, ri rajawaxic u jiq'uic ri u chuk'ab ruc' jic'abal u pa chi'aj xukuje' jic'abal rij wi'aj, we man jewa', man quenakajin ta awuc'.”

¹⁰ Ri e banal tak etzelal cäquirik na k'oxomal, are c'u ri lok'ok'ebal u c'u'x ri Ajawaxel quebupis na ri caquicu'ba' qui c'u'x chrij.

¹¹ Chixquicot ruc' ri Ajawaxel, utzalaj tak winak ri kas utz iwanima'; ¡chixquicotok, xukuje' ruc' rakoj chi'aj re quicotemal!