Salmib 31 - Quiché Bible

Ri cu'lbal c'uxaj chrij ri Ajawaxel

¹ Ajawaxel, uc' la quintzucuj wi to'banic; mawi jubik' mesaj la nu q'uixbal. Chincolo' la, suc'alaj Dios.

² Choc la il che nu tatabexic; ¡cojo la aninakil, chinto'tajisaj la chanim! ¡Chux la nu nimalaj abaj ri quinch'uk wi wib, che cowilaj ja che nu to'tajisaxic!

³ ¡Lal ri' ri nimalaj abaj, ri nu cowilaj ja! c'ama' la nu be, chinch'uku c'u la; nim c'ut u k'ij ri bi' la.

⁴ ¡Chinesaj la pa ri c'amibal ri cojom pa ri nu be, lal ri lal ch'ukul wech!

⁵ Pa k'ab la quinjach wi ri wuxlabal; ¡chinto'tajisaj la, Ajawaxel, Dios, aj kastzij!

⁶ Quinwetzelaj qui wäch ri quequik'ijilaj ri diosib man c'o ta qui beya'l; nu yo'm c'u ri cu'lbal nu c'u'x chrij ri Ajawaxel.

⁷ Ri lok'ok'ebal c'u'x la cuc'am ulok quicotemal pa wanima'. Ilom la ri nu bis, eta'm la ri nu c'axc'olil;

⁸ man xinjach ta la pa u k'ab ri c'ulel; ¡xintac'aba' la pa jun c'olbal ri co c'olic!

⁹ Ajawaxel, chel c'u'x la chwe, xak quieb cubij panuwi'. Ri k'oxomal cuq'uis ri qui chuk'ab ri nu bak'wäch, ri nu cuerp, ronojel ri nu c'ojical.

¹⁰ ¡Ri k'oxom xukuje' tak ri juyuwem caquiq'uis tzij paquiwi' ri e u junab ri nu c'aslemal! Ri wetzelal cuq'uis ri nu chuk'ab; ri nu cuerp cätajin cätukaric.

¹¹ Xa in yacal qui tze' ri e nu c'ulel, cätze'x nu wäch cumal ri e nu c'ulja, ri queta'm nu wäch xa cäquixe'j quib chwe. Ri quinquic'ulaj pa tak ri be quebanimaj chnuwäch.

¹² Man quinnataj ta chi chque, je ta ne ri in cäminak chic. Xa in junam ruc' jun xaru' ri muchitajinak.

¹³ Quincuinic quinto ri qui jasjatem ri winak, cäquibij: “C'o c'axc'ol pa ronojel c'olbal.” Junam qui banom qui tzij che u banic c'ax chwe; cäquichomaj nu cämisaxic.

¹⁴ Ri in c'ut, Ajawaxel, nu cuban nu c'u'x chij la; ri in nu bim: “Lal ri nu Dios.”

¹⁵ Ri nu c'aslemal pa k'ab la c'o wi; chinesaj la pa qui k'ab ri e nu c'ulel ri quincokataj.

¹⁶ Chila la we pataninel ech la ri' ruc' utzil, chinto'tajisaj la pa ri lok'ok'ebal c'u'x la.

¹⁷ Che la quintz'onoj wi tok'ob, Ajawaxel; ¡Minya' la pa ri q'uixbal! ¡E are cheya' la ri e banal tak etzelal pa q'uixbal, chekasaj la bic pa ri mukbal!

¹⁸ Mech'aw chic ri e banal tak tzij, ri quech'aw ruc' yok'onic, ruc' q'uiakoj xiquinaj, ri cäquiban c'ax che ri winak ri man c'o ta u mac.

¹⁹ ¡Sibalaj nim ri utzil la chque ri nim quil la cumal! Quec'ol la jacha' jun k'inomal chquiwäch ri winak, cajach c'u la chquiwäch ri qui cuban qui c'u'x chij la.

²⁰ Ruc' ri u wächbal la quech'uc la chquiwäch ri qui chomanic ri e itzel tak winak; quech'uc' la chuxe' ri u xotil ri achoch la chquiwäch ri qui yok'onic ri e qui c'ulel.

²¹ Tewichi'm ri Ajawaxel, chi ruc' ri lok'ok'ebal u c'u'x xebuban nimak tak jastak chwe pa tak ri jok'otaj aretak e c'o c'axc'olil.

²² Pa ri nu ch'ujilal xinchomaj chi in q'uiakom apan la chwäch la; aretak c'ut xintz'onoj ri to'banic la xta' la ri nu rakoj chi'aj.

²³ Chilok'ok'ej ri Ajawaxel, iwonojel ri ix jicalaj tak pataninel rech, quebuchajij c'ut ri jic canima'; are c'u ri cäquinimarisaj quib cuya' na u wi' ri c'äjisabal qui wäch.

²⁴ Chiya' chuk'ab xukuje' chajin anima' chque tak ri e iwanima' iwonojel ri i cuban i c'u'x chrij ri Ajawaxel.