Salmib 30 - Quiché Bible

Bix re maltioxinic che ri Ajawaxel

¹ Ajawaxel, in quinya' k'ij la rumal chi xincol la, man yo'm ta la be chi cäquitze'j nu wäch ri e nu c'ulel.

² Ajawaxel, nu Dios, xintz'onoj ri to'banic la, xincunaj c'u la;

³ lal, Ajawaxel, xinesaj la pa u k'ab ri cämical; xya' la nu c'aslemal, man xintzokopij ta la.

⁴ Ix ri ix jic chuwäch ri Ajawaxel, ¡chebibixoj bix che, chi k'ijilaj ri tastalicalaj u bi'!

⁵ Xa c'u jubik' cäbeytaj ri royowal, are c'u ri rutzil man c'o ta u q'uisic. We cujok' chak'ab, ak'abil c'o chic ka quicotemal.

⁶ In xinna' wib chi co in c'olic, xinchomaj c'ut: “Man c'o ta jas quintzakow na.”

⁷ Lal Ajawaxel, pa ri tok'ob la xinjekeba' la pa jun cowilaj c'olbal. Xk'il c'u la ri to'banic la chwe xsach nu cux rumal ri xe'n ib.

⁸ Lal, Wajaw ri xukuje' nim banic la, quinsiq'uin che la xukuje' quintz'onon che la:

⁹ ¿Jas ri cäch'äquic we quincämic quinc'am c'u bic pa mukic? ¡Ri puc'uc' ulew man cäcuin ta cuya' k'ij la mawi cutzijoj ri jiquil la!

¹⁰ Ajawaxel, chintatabej la, chel c'u'x la chwe; Ajawaxel, ¡chinto' la!

¹¹ E q'uexom la pa xojowem ri nu juyuwem esam la ri atz'iak re bis chwe, cojom la jun watz'iak re nimak'ij.

¹² Rumal ri', Ajawaxel xukuje' Dios, man cuya' taj quincanaj xak chi jeri': quebenbixoj na bix che u ya'ic k'ij la amak'el quinya' na maltioxinic che la.