Salmib 3 - Quiché Bible

Ch'awem che u tz'onoxic ri u to'banic ri Ajawaxel

¹ Ajawaxel, e q'ui ri qui banom qui c'ulel chwe, e q'ui ri qui walijisam quib chwij;

² ¡e q'ui ri cäquibij chi ri nu c'aslibal: “man c'o ta u to'tajic rumal ri Dios!”

³ Are c'u ri lal, Ajawaxel, lal ri ch'ukubal wib, lal nimarisabal nu k'ij, lal ri cäyo'w la ri chajin anima' chwe.

⁴ Cuc' rakoj tak chi'aj quintz'onoj to'banic che ri Ajawaxel cutzelej c'u ulok u wäch nu tzij kas pa ri tastalicalaj u juyub,

⁵ quink'oyic, quinwar c'ut, quinc'astaj chi c'ut, rumal rech chi ri Ajawaxel cuya' ri u to'banic chwe.

⁶ Man quinxe'j ta wib che we jumulaj ajch'ojab ri' ri quisutim wij ri e c'o che nu ch'äquic.

⁷ Walij la, Ajawaxel. ¡Chincolo' la nu Dios! Lal quech'ayow la chiquipalaj ri qui banom qui c'ulel chwe; ¡Cäc'äjij na la ri qui ware ri e banal tak etzelal!

⁸ Lal, Ajawaxel, lal ri cujto'tajisan la; ¡tewichi'j ba' la ri tinimit la!