Salmib 29 - Quiché Bible

Ri u cuinelalaj u ch'abal ri Ajawaxel

¹ Chik'ijilaj ri Ajawaxel, ix ri ix aj caj; chik'ijilaj ri u cuinem xukuje' ri u juluwem ri Ajawaxel,

² chiya' u k'ij ri je'lalaj u bi' ri Ajawaxel; chik'ijilaj ri Ajawaxel pa ri je'lalaj u k'ijilabal.

³ Ri u ch'abal ri Ajawaxel cäxojlin puwi' ri plo; ri Dios ri nim u k'ij are cäbanow ri cakulja: ¡ri Ajawaxel c'o puwi' ri nimalaj plo!

⁴ Ri u ch'abal ri Ajawaxel c'o u cuinem; ri u ch'abal ri Ajawaxel c'o u chuk'ab;

⁵ ri u ch'abal ri Ajawaxel quebujak'ij tak ri chacalte'. Ri Ajawaxel quebujak'ij tak ri chacalte' re ri Libano.

⁶ Quebuyicopisaj tak ri juyub Libano xukuje' ri Sirion; ¡cuban chque chi quech'opinic jacha' ama'ib tak wacax xukuje' alaj ama'ib tak wacax!

⁷ Ri u ch'abal ri Ajawaxel quebuq'uiak rak' tak k'ak';

⁸ ri u ch'abal ri Ajawaxel cubano chi cayicop ri chaki'j uwo sak; ¡ri Ajawaxel cubano chi cayicop ri chaki'j uwo sak re Cades!

⁹ Ri u ch'abal ri Ajawaxel cuban chque ri ati'tab tak masat chi quebalanic, cuq'uis tzij paquiwi' ri räx che' ri e c'o pa tak ri c'ache'laj. Conojel c'ut caquiya' na u k'ij chupam ri rachoch.

¹⁰ Ri Ajawaxel cätakan puwi' ri jäb; ¡ri Ajawaxel are' ajawinel ri c'o u takanic chbe k'ij sak!

¹¹ Ri Ajawaxel cuya' u chuk'ab ri u tinimit; ri Ajawaxel cutewichi'j ri u tinimit ruc' jamaril.