Salmib 27 - Quiché Bible

Ri Ajawaxel are' nu chäj xukuje' nu to'tajisaxic

¹ Ri Ajawaxel are' nu chäj xukuje' ri nu to'tajisaxic, ¿jachin ta chuwäch quinxe'j ta wi wib? Ri Ajawaxel are cäto'w ri nu c'aslemal, ¿jachin ta chuwäch quinxe'j ta wi wib?

² Ri e banal tak etzelal, ri qui banom qui c'ulel chwe, caquimulij quib che nu ch'äquic che c'u u sachisaxic nu wäch; e are' c'ut ri caquichak'ij quib quetzak c'ut.

³ Pune' cäsutix wij cumal ajch'ojab, ri wanima' man cuxe'j ta rib; pune' caquisuc'umaj quib che u banic ch'o'j wuc', ri in man c'o ta cubij nu c'u'x.

⁴ Xa jun jasach nu tz'onon che ri Ajawaxel, xa jun jasach quinrayij: chi quinc'oji' chupam ri rachoch ri Ajawaxel conojel ri k'ij ri quinc'asi' na, che u k'ijilaxic pa ri rachoch xukuje' che rilic ri u je'lical.

⁵ Aretak chepe ri lawalolaj tak k'ij, ri Ajawaxel quinuch'uk ruc' ri u mu'jal, quinuto' pa ri rachoch; quinuya' puwi jun nimalaj abaj che u to'ic wib.

⁶ Jeri' quincuinic quinyac ri nu jolom paquiwi' ri e nu c'ulel; quincuin c'u ri' quinya' tabal tok'ob pa ri achoch la, ruc' tak rakoj chi'aj re quicotemal quebenbixoj bix che ri Ajawaxel.

⁷ Quinrak nu chi che ch'abexic la Ajawaxel, chintatabej la, chel c'u'x la chwe, ¡chinch'abej la ulok!

⁸ Ri wanima' cubij chwe: “chatzucuj ri u wächbal ri Ajawaxel.” Are c'u ri in, Ajawaxel, quintzucuj ri wächbal la.

⁹ ¡Mäc'u' ib la chnuwäch! ¡Minxutuj la ruc' oyowal! Xuwi' ri lal, lal to'l wech. Minya' la can nu tuquiel ri ma ta c'o cuya' to'banic chwe, lal c'ut ri nu Dios xukuje' nu Colonel.

¹⁰ Pune' ri nu tat xukuje' ri nu nan quinquiwonoba' canok, lal, Ajawaxel, quinchajij na la.

¹¹ Ajawaxel chc'utu' ri be la chnuwäch; chc'ama' la nu be pa ri suc'alaj be, qui mac quech ri e nu c'ulel;

¹² minjach la pa qui k'ab, quiwalijisam c'u quib jalul tak k'alajisanelab chwij, aninak c'u e c'olic.

¹³ Ri in cu'l nu c'u'x chi quinwil na ri rutzil ri Ajawaxel pa ri u beytajic we nu c'aslemal ri'.

¹⁴ ¡Chacu'ba' a c'u'x chrij ri Ajawaxel! ¡Chacojo' a chuk'ab, muban quieb a c'u'x! ¡Je', chacu'ba' a c'u'x chrij ri Ajawaxel!