Salmib 26 - Quiché Bible

Jun utzalaj c'aslemal ri kas ch'ajch'oj

¹ Ajawaxel, bana' la suq'uilal chwe, man c'o ta macaj pa ri nu c'aslemal. Mawi jubik' quinwesaj ri cu'lbal nu c'u'x chij la;

² nic'oj la ri nu c'aslemal, tijtijobej la wij, ¡tijtijobej la rij ri nu chomanic, xukuje' ri e muktal pa ri wanima'!

³ Natal ri lok'ok'ebal c'u'x la chwe, xukuje' in bininak jic chwäch la;

⁴ mawi jumul xebenwachilaj ri banal tak tzij, mawi xinwuc'aj ta wib cuc' ri quieb qui wäch.

⁵ Quinwetzelaj u wäch ri qui mulin ib ri e banal tak etzelal, ¡mawi jumul xebenwachilaj taj ri e banal tak etzelal!

⁶ E ch'ajtajinak ri nu k'ab, e josk'itajinak elinak ri macaj chque, Ajawaxel, quinwaj quinnakajin ruc' ri porobal ri ech la,

⁷ quebenbixoj bix che u ya'ic maltioxinic, quintzijoj c'u tak ri mayibal ri e banom la.

⁸ Ajawaxel, in quinlok'ok'ej ri achoch la ri lal c'o wi, ri c'olbal jawije' jekel wi ri juluwem la.

⁹ Mesaj la ri nu c'aslemal junam cuc' ri ajmaquib; je minc'ulmaj jas ri cäquic'ulmaj ri cämisanelab,

¹⁰ ri quinojisam ri qui k'ab che etzelal xukuje' banoj u pa k'abaj.

¹¹ In bininak c'ut chupam ri nu ch'ajch'ojil; chinto'tajisaj la chel c'u'x la chwe.

¹² In tac'al puwi' cowilaj ulew; ¡quintewichi'j ri Ajawaxel chuwäch ri u tinimit!