Salmib 25 - Quiché Bible

Ch'awem che u tz'onoxic chi chc'am ka be rumal ri Dios

¹ Ajawaxel, uc' la quinch'aw wi;

² nu Dios, chij la cu'l wi nu c'u'x: mintzokopij la rech minkaj pa ri q'uixbal. ¡Maquitze'j nu wäch ri e nu c'ulel!

³ ¡Mawi jubik' mel qui q'uixbal ri qui cuban qui c'u'x chij la! ¡Are chel qui q'uixbal ri man c'o ta rumal cäquiyac quib che c'ulelaxic la!

⁴ Ajawaxel, chec'utu' ri be la chnuwäch; c'ama' la nu be pa ri suc'alaj be la;

⁵ c'ama' la nu be, chc'utu' la ri kastzij la chnuwäch, lal c'ut ri lal nu Dios xukuje' Colonel. ¡Chij la nu cu'ban wi nu c'u'x conojel jok'otaj!

⁶ Ajawaxel, chnataj ri lok'ok'ebal c'u'x la che la xukuje' ri ch'uch'ujil la ri amak'el c'utum la chkawäch,

⁷ menataj chi c'ut ri nu mac che la, mawi ri etzelal ri xinban pa ri wac'alal. Ajawaxel, chinnataj ba che la, rumal ri lok'ok'ebal c'u'x la xukuje' ri utzil la.

⁸ Ri Ajawaxel utz xukuje' suc'; quebupixbej ri ajmaquib pa ri qui c'aslemal,

⁹ cuc'am qui be ri e mach'alic; ¡quebutijoj che ri suq'uilal!

¹⁰ Conojel tak ri u be e re lok'ok'ebal c'uxaj xukuje' e re kastzij chque ri cäquiban ri u rayibal xukuje' ri cäquinimaj ri u takanic.

¹¹ Ajawaxel, sibalaj nim ri wetzelal; sacha' la nu mac, ya' la u k'ij ri bi' la.

¹² Ri winak ri nim caril wi ri Ajawaxel, ri are' cuc'ut ri be chuwäch ri takal u takexic rumal;

¹³ cunojisaj che utzil cuya' c'u ri rechbexic ri ulew chque ri e rija'lil.

¹⁴ Ri Ajawaxel ranima' rib cuc' jachintak ri nim caquil wi, cuya' c'u retamaxic ri u c'ulwächinic chque.

¹⁵ Amak'el quinalwächin che ri Ajawaxel, rumal rech chi quinresaj pa ronojel c'ax.

¹⁶ Chinila' la Ajawaxel, chel c'u'x la chwe, xak nu tuquiel in c'olic, quinbisonic.

¹⁷ Cätajin cänimataj ri u bis ri wanima'; chinesaj la pa tak ri c'ax ri in c'o wi.

¹⁸ Chila la ri nu bis, xukuje' ri welem ch'u'j, sacha' la ri nu mac.

¹⁹ Chilampe' la, e joropa' ri e nu c'ulel e c'olic ri cäquirayij nu cämisaxic.

²⁰ ¡Chinchajij la, to'tajisaj la ri nu c'aslemal! ¡Mintzokopij la rech man quel ta nu q'uixbal, uc' la quintzucuj wi ch'ukubal wib!

²¹ Chinuch'uku ri nu tz'akatiquil pa ronojel xukuje' chi man c'o ta nu mac, nu cuban c'u nu c'u'x chij la.

²² ¡Nu Dios, chesaj la ri Israel chquipam tak ri c'ax ri c'o wi!