Salmib 24 - Quiché Bible

Ri Ajawinel re ri chicaj

¹ Rech ri Ajawaxel ronojel ri uwächulew, rachil ronojel ri c'o chuwäch, rachil conojel ri e c'asc'oj chuwäch.

² Rumal rech chi are' ri Ajawaxel xcojow ri u tiq'uilibal ri uwächulew, co xutiq'uiba' paquiwi' tak ri plo xukuje' paquiwi' tak ri nima'.

³ ¿Jachin ri cacuinic cäpaki' puwi' ri u juyub ri Ajawaxel? ¿Jachin ri cäcuinic cäjeki' chupam ri tastalicalaj rachoch?

⁴ Ri e ch'ajch'oj ri e u k'ab xukuje' ri u chomanic ri man c'o ta jun macaj pa ri u c'aslemal; ri man quebuk'ijilaj ta ri banom tak diosib mawi cuban tak ri chi'nic ri kas cäban na ruc' subunic.

⁵ Ri Ajawaxel, ri u Dios xukuje' Colonel, cutewichi'j na we winak ri', cuban na suq'uilal che.

⁶ Rajawaxic je qui banic wa' ri quetzucun che ri Ajawaxel, ri cäquitzucuj ri u wäch ri u Dios ri Jacob.

⁷ ¡Chixjaktajok, junalic tak oquibal! ¡Chejakjob can ri cacab tak i xak, coc c'u na ri ajawinel aj juluwem!

⁸ ¿Jachin wa' we Ajawinel ri' aj juluwem? ¡Are' ri Ajawaxel, c'o u chuk'ab xukuje' c'o u cuinem! ¡Are' ri Ajawaxel, ri c'o u cuinem chupam ri ch'o'j!

⁹ ¡Chixjaktajok, junalic tak oquibal! ¡Chejakjob can ri cacab i xak, coc c'u na ri Ajawinel aj juluwem!

¹⁰ ¿Jachin wa' we Ajawinel ri' aj juluwem? ¡Are' ri Ajawaxel ri Cajaw ri ajch'ojab! ¡Are' ri Ajawinel aj juluwem!