Salmib 22 - Quiché Bible

Rakoj chi'aj re c'axc'obic xukuje' bix re k'ijilanic

¹ Nu Dios, nu Dios, ¿Jasche in yo'm la canok? ¿Jasche man cäpe ta la che nu to'ic? ¿Jasche man cäta' ta la ri wok'ej?

² Nu Dios, pa k'ij xukuje' chak'ab quinsiq'uin che la, man c'o ta c'u catzelej la u bixic; man c'o ta uxlanem nu rikom.

³ Are c'u ri lal, lal tastalic; cajawin la, cak'ijilax la rumal ri Israel.

⁴ Ri ka mam xquicu'ba' qui c'u'x chij la; xcu'bi qui c'u'x, xetor c'u la;

⁵ xquitz'onoj to'banic che la, xya' c'u la ri torotajic chque; xquicu'ba' qui c'u'x chij la, man xet'orij ta c'u la.

⁶ Ri in man in ta jun achi, xane xa in jun xjut; ¡xa in yacal qui tze' ri winak!

⁷ Ri quinquilo cäquitze'j nu wäch; cäquiyuch'ula' qui palaj chwe, cäquisutisa' qui jolom;

⁸ je c'u caquibij wa': “Wa' xucu'ba' u c'u'x chrij ri Ajawaxel, chto'tajisax c'u rumal ri Ajawaxel. Sibalaj c'u lok' chuwäch, chto'tajisax c'u rumal.”

⁹ Jewa': Xban la chi xinq'uiy pa ri u c'u'x ri nu nan; xban la chi xinuxlan cho u c'u'x ri nu nan.

¹⁰ C'ä majok chinalaxok, xincoj chuxe' ri chajinic la; kas pa ri u c'u'x ri nu nan, ri nu Dios are ri lal.

¹¹ Manajtajisaj ib la chwe, nakaj chi c'ut c'o wi ri u q'ueyowal chwe man c'o ta c'u jachin ta c'o wuc' che nu to'ic.

¹² Ri qui banom qui c'ulel chwe qui sutim wij e jacha' ta ne' ama'ib tak wacax, e jacha' c'analaj tak wacax re Basan.

¹³ Que wunic jacha' c'analaj tak coj, cäquic'ab ri qui chi', cäquiq'uiak quib chwij.

¹⁴ In jacha' ja' ri cajamajobic; e tuktubinak ri e nu bakil, ri wanima' junam ruc' ri xca'b ri cabelebob chnupam.

¹⁵ Chaki'j chic ri u pa nu chi' jacha' jun xot re u wi ja; nac'al ri wak' pa nu chi'. ¡In q'uiakom la pa ri ulew re cämical!

¹⁶ Jumulaj banal tak etzelal e jacha' ri tz'i' qui sutim wij; e qui worom ri nu k'ab xukuje' ri e wakan.

¹⁷ ¡Quincuinic quebenwajilaj ri nu bakil! ri e nu c'ulel man cäquesaj ta ri qui bak'wäch chwij.

¹⁸ Quijachom ri watz'iak chquiwäch, xetakleben c'u chrij.

¹⁹ Ri lal c'ut, Ajawaxel lal nu chuk'ab, ¡minya' la canok!, ¡saj la chanim che nu to'ic!

²⁰ Chinto'tajisaj minc'äm pa u chi' ri ch'ich' re ch'o'j, chek'atij la we tz'i' ri' rech man quinquicämisaj taj;

²¹ chinto' la pa qui chi' we coj ri'; ¡chinto' la chuwäch ri cuc'a' we ama'ib tak wacax ri'!

²² Quinya' na tzijol la chque ri wachalal, quinya' na k'ij la pa tak ri u mulixic quib.

²³ Ix ri nim quiwil wi ri Ajawaxel, ¡chiya' u k'ij iwonojel ri ix rija'l ri Jacob! ¡Chixk'ijilan che iwonojel ri ix rija'l ri Israel!

²⁴ Ri are' ma ta coc il mawi xak ta caroc'owisaj ri qui rikoj c'ax ri mebayib, mawi cuc'u' ta rib chquiwäch. ¡Ri are' quebutatabej aretak caquitz'onoj ri u to'banic!

²⁵ Chuwäch ri tinimit la ri man c'o ta cajilabal quink'ijilaj ri jiquil la; chquiwäch ri queyo'w k'ij la quintz'akatisaj na ri e nu chi'nic.

²⁶ Chixwok, ix ri cäban c'ax chiwe c'ä quixnoj na; chik'ijilaj ix ri Ajawaxel, ix ri quixtzucun che, chixc'asal c'u q'ui junab.

²⁷ Ronojel qui wäch winak xukuje' nimak tak tinimit que conojel ri e u jutz'il ri uwächulew: chnataj ri Ajawaxel chiwe, chixpet ruc'; chixelxucul chuwäch.

²⁸ Ri Ajawaxel, ajawinel c'ut, ri are' cätakan paquiwi' ri nimak tak tinimit.

²⁹ Chi meja' iwib xuwi c'ut ri are' chik'ijilaj conojel ri e c'o pa telechinic, conojel ri quetzelej na pa ri ulew, man c'o ta c'u qui c'aslemal pa quech wi.

³⁰ Ri e wija'l quek'ijilan na che ri Ajawaxel, cäquitzijoj na ri are' pa ronojel ri qui c'aslemal;

³¹ chque ri c'a maja' quebalaxic caquitzijoj na ri u suq'uilal chque xukuje' tak ri e u banoj.