Salmib 21 - Quiché Bible

Jun bix re ch'äcanic

¹ Ajawaxel, ri ajawinel cäquicotic rumal rech chi yo'm la u chuk'ab; sibalaj cäquicotic rumal rech chi yo'm la ch'äcanic che.

² Yo'm la che ronojel ri u rayibal; man xxu'yaj ta la ronojel ri u tz'onon che la.

³ Xc'amowaj la cuc' nimak tak tewichibal, xcoj la jun corona re k'an puak che ri u jolom.

⁴ Xuta' c'aslemal che la, xya' c'u la juyukaj c'aslemal che ri beytajel.

⁵ Rumal ri to'banic la, nim ri u cuinem; yo'm la u k'ij, nim c'u u banic.

⁶ Tewichi'm la chbe k'ij sak; nojisam la che quicotemal rumal ri c'olem la ruc'.

⁷ Lal, nimalaj ajawinel, mawi jubik' catzakmaj la, cuban c'u c'u'x la chrij ri Ajawaxel; ¡cuban c'u'x la chrij ri lok'ok'ebal u c'u'x ri Dios ri c'o pa ri caj!

⁸ Ri chuk'ab la quebuch'äc conojel ri qui banom qui c'ulel che la; ri wiquiak'ab la quebuch'äc na conojel ri cäquetzelaj wäch la;

⁹ queq'uiak na la pa jun jorno ri cänicowic aretak cäpe la che u k'atic tzij. Ri Ajawaxel pa ri royowal, cusach na qui wäch ruc' jun k'ak' ri cächajirisanic.

¹⁰ Cäsach na la qui wäch cho ri uwächulew chquixo'l ri winak ri e calc'ual xukuje' ri e quija'lil.

¹¹ Pune' cäcaj cäquiban c'ax che la cäquichomaj u yaquic quib chij la, man c'o ta jas quecuin che u banic.

¹² Quebokataj c'u na la bic; queq'uiak na la rumal ri q'uiakbal ch'ab la.

¹³ ¡Walij la ruc' ri cuinem la, Ajawaxel! ¡Cäkoc'owisaj cuc' tak bix ri e ch'äcanic tak la!