Salmib 20 - Quiché Bible

Ch'awem ruc' ri Dios re ch'äcanic

¹ Chutatabej ri a ch'awem ri Ajawaxel aretak at c'o pa bis, are' ri u Dios ri Jacob chuya' to'banic chawe.

² Chutaka' ulok to'bal awib xukuje' to'l awech pa ri k'ijilabal ri c'o pa Sion.

³ Chenataj conojel ri a sipanic che, chebuc'amowaj ruc' quicotemal ri e a tz'onobal tak tok'ob ri quebaporoj puwi' ri porobal.

⁴ Chebutz'akatisaj conojel ri e a rayibal, chuq'uisa' qui banic conojel ri jastak ri a chomam qui banic.

⁵ Cäkaban c'u na nimak'ij rumal ri a ch'äcanic, quekawalijisaj tak na etal pa u bi' ri ka Dios. Chuya' ri Ajawaxel chawe ronojel ri catz'onoj che.

⁶ Kas weta'm chi ri Ajawaxel cuya' ri ch'äcanic che ri ajawinel ri u cha'om; chi cutzelej na u wäch ri xutz'onoj che kas pa ri tastalicalaj u caj, quebuya' c'u na nimak tak ch'äcanic che rumal ri u cuinem.

⁷ Jujun qui cuban qui c'u'x chrij ri qui carwaj re ch'o'j, jujun chic qui cuban qui c'u'x chquij ri qui quiej; are c'u ri uj ka cuban ka c'u'x chrij ri Ajawaxel ri ka Dios.

⁸ Ri e are' quemejmob ri qui ch'ec, quetzakic, are c'u ri uj cäkatakej binem man cujtzak taj.

⁹ Ajawaxel, ¡Ya' la ri ch'äcanic che ri Ajawinel! ¡Tzelej la u wäch ri ka tzij aretak chujsiq'uin che la!