Salmib 2 - Quiché Bible

At ri' ri nu c'ojol

¹ ¿Jasche caquiwalijisaj quib ri tinimit ri e k'ijilal diosib? ¿Jasche quequichomala' qui banic jastak ri man c'o ta qui beya'l?

² Ri ajawinelab xukuje' ri k'atal tak tzij re ri uwächulew, junam caquiwalijisaj quib chrij ri Ajawaxel xukuje' chrij ri rajawinel ri u cha'om.

³ Cäquirak c'u qui chi': “¡Quekesaj na ri e qui tikom ch'ich' ch'ic chke! ¡Quekaquir na kib pa tak ri quijat'ibal!”

⁴ Ri Ajawaxel ri cätakan pa ri caj, cutze'j qui wäch;

⁵ oyowarinak, c'ut quebuxibij; nojinak che oyowarem cubij chque:

⁶ “Nu tasom chic ri wajawinel puwi' ri Sion, ri tastalicalaj nu juyub.”

⁷ Quinya' u bixic ri u chomam u banic ri Ajawaxel: Ri are' u bim chwe: “At at nu c'ojol; in, camic in uxinak a tat.

⁸ Chatz'onoj chwe chi chebenya' ri nimak tak tinimit chawe jacha' che awechbal, xukuje' ne' ri c'ä q'uisbal jutz' re ri uwächulew are c'u ri in quebenya' na chawe.

⁹ Ruc' bara' re ch'ich' quebaban na ch'akatak chque tak ri ajawinelab; ¡quebaban na ch'akatak chque jacha' ri cäban chque tak ri bo'j re t'ac!”

¹⁰ Ajawinelab xukuje' k'atal tak tzij re ri uwächulew, chich'obo' wa', ¡Chitijoj iwib che we tijonic ri'!

^11-12 Chik'ijilaj ri Ajawaxel ruc' quicotemal, xukuje' nim chiwila' wi; chimeja' iwib chuwäch ruc' birbitem, mäyactaj ne royowal quixecäm c'u ne' ri ix chupam ri be, aninak c'ut cäyactaj ri royowal. ¡Utz quech ri cäquitzucuj u ch'ukic quib ruc' ri Dios!