Salmib 19 - Quiché Bible

Ri u juluwem ri Dios pa ri winakirisanic

¹ Ri caj cutzijoj ri u juluwem ri Dios; ri räxalaj caj cutzijoj chke ri u winakirisam.

² Ri k'ij tak quequitzijola' tak chquixo'l, ri chak'ab tak caquibinisaj u bixic.

³ Pune' man c'o ta tzij quetatajic, mawi c'o jun ch'abal cätatajic,

⁴ pa ronojel ri uwächulew benak ri u tijonic, cäbe c'ä pa ri q'uisbal jutz' re ri uwächulew, c'ä jawije' ri c'o wi ri u jekelibal ri k'ij.

⁵ Are c'u ri k'ij cäquicotic cuchaplej ruc' quicotemal ri u xiq'uixic ri u be jacha' jun xiq'uinel; jacha' jun jiaxel ri quel ulok chupam ri u warabal re c'ulanem.

⁶ Quel ulok ri k'ij, pa jun u xcut ri caj cäcotin c'ut c'ä copan na pa ri jun uxcut chic, man c'o ta c'u ri cacuinic canimaj ta chuwäch ri u k'ak'al.

⁷ Tz'akat ri u tijonic ri Ajawaxel, cuya' c'u c'ac' c'aslemal. Ri u takanic ri Ajawaxel jic, cuya' c'u retamanic ri man c'o ta retamanic.

⁸ Ri u pixab ri Ajawaxel ri e banom e suc', quequic'am c'u ulok quicotemal che ri anima'. Ri u takomal ri Ajawaxel ch'ajch'oj quebunojisaj c'ut ri bak'wächaj che chäj.

⁹ Ri now ib chuwäch ri Ajawaxel ch'ajch'oj man caq'uextaj taj xak je wi. Ri e u pixab ri Ajawaxel ri e tz'ibam e kastzij, conojel tak e suc'.

¹⁰ ¡C'o na cajil chuwäch ri k'an puak ri pakal rajil!, ¡c'o na qui qui'al chuwäch ri juyubal räx cab ri c'o pa ri akaj!

¹¹ Cajwataj c'u che u pixbexic we pataninel ech la ri', c'o cärechbej che ri qui nimaxic.

¹² ¿Jachin ta ri quebuch'ob ri kas e u sachinakil? ¡Ajawaxel sacha' la ri nu mac ri e ch'ukutalic!

¹³ Chesaj la ri banoj nimal che ri pataninel ech la; mäya' la be che ri banoj nimal chi catakan panuwi'. Jeri' quinux jun winak ri ch'ajch'oj u c'aslemal; man c'o ta mac cäriktaj ta chwij.

¹⁴ Chec'amar ta ri e nu tzij umal la xukuje' tak ri nu chomanic, oh Ajawaxel, panibal xukuje' torol wech.