Salmib 18 - Quiché Bible

Jun bix re ch'äcanic

¹ Lal, Ajawaxel, lal nu chuk'ab, ¡quinlok'ok'en che la!

² Lal ri ch'ukubal wech, ri nu c'olbal che panem, lal torol wech, nu Dios, ri nimalaj abaj quinuch'uku, nu quetequic ch'ich', ri cuinem ri quinto'tajisanic, ri c'ubal wib ri sibalaj naj elinak chicaj.

³ Lal, Ajawaxel takal k'ijilaxic la: aretak quinsiq'uin che la, quinesaj la pa qui k'ab ri qui banom qui c'ulel chwe.

⁴ Ri cämical xinuralij pa tak ri e u colob; xinxe'j wib chuwäch ri uwo ja' ri sachal wächaj.

⁵ Ri cämical xinumojcolij pa tak ri u colob; ¡xinkaj pa tak c'amibal re cämical!

⁶ Pa ri nu bis xinsiq'uij ri Ajawaxel; xintz'onoj ri u to'banic ri nu Dios, xinutatabej ri are' pa ri rachoch; xopan ri nu rakoj chi'aj pa ri u xiquin.

⁷ Xuban c'u jun nimalaj cabrakan cho ri ulew: xeyicop ri qui tac'alibal tak ri juyub; xeyicya'x rumal ri royowal ri Ajawaxel.

⁸ Pa ri u tza'm quel ulok si'b, pa ri u chi' jun k'ak' ri cächajirisanic; ¡rachak tak k'ak' ri quejuluwic quebel ulok pa u chi'!

⁹ Xupac ri ch'ukuwinak ri caj, xkaj ulok. Chquixe' ri rakan c'o k'ekalaj tak sutz'.

¹⁰ Xquiejen puwi' jun aj cajalaj to'banel ri e c'o u xic', xrapinic, xch'elex bic rumal ri u xic' ri quiakik'.

¹¹ Ri nimalaj k'ekumal ri sutininak rij xucoj che c'ubal rib xukuje' ri k'ekalaj sutz' ri nojinak che ja'.

¹² Jun juluwem ri cächuplinic xel ulok chuwäch; xebel ulok chquipam tak ri sutz' sakbach, xukuje' rachak k'ak' ri quenicowic.

¹³ Ri Ajawaxel, ri c'o pa ri caj, xubano chi xtataj ri u ch'abal re cakulja chicaj, sakbach tak xukuje' rachak tak k'ak' ri quejuluwic.

¹⁴ Xebuq'uiak ulok ri u ch'ab xukuje' ri u caypa', xuban c'u chque ri e nu c'ulel qui tuquin quib xebanimajic.

¹⁵ Ri u xe' ri plo xk'alajinic; ri u tiq'uilibal ri uwächulew xc'utunic, rumal ri u ch'abal ri Ajawaxel, rumal ri cowilaj ruxlabic ri xuq'uiako.

¹⁶ Ri Dios xuyuk ulok ri u k'ab chwe chicaj, ruc' ri u k'ab xinresaj pa ri nimalaj plo.

¹⁷ Xinresaj pa qui k'ab ri c'ulel ri c'o qui cuinem, ri cäquetzelaj nu wäch xukuje' c'o na qui chuk'ab chnuwäch.

¹⁸ Xquimulij quib chwij aretak in c'o pa c'axc'olil, are' c'u ri Ajawaxel xuya' ri u to'banic chwe:

¹⁹ Xinuya' pa ri torotajic; xinto'tajisaj c'u rumal rech chi in lok' chuwäch.

²⁰ Ri Ajawaxel u yo'm ri tojbal wech ri takal che ri ch'ajch'ojalaj nu c'aslemal,

²¹ nu terenem c'ut ri u be ri Ajawaxel; mawi jubik' nu xutum can ta ri nu Dios.

²² E c'o conojel ri u takanic pa nu jolom; man c'o ta jun u pixab ri ma ta nu nimam.

²³ In bininak pa jun c'aslemal jicom chuwäch; nu najtajisam wib rech man quinban ta ri etzelal.

²⁴ Ri Ajawaxel u yo'm ri tojbal wech rumal ri ch'ajch'ojalaj nu c'aslemal chuwäch.

²⁵ Lal Ajawaxel, lal jic ruc' ri jic, man c'o ta jas cäbij la chrij ri man c'o ta jas cäbix chrij,

²⁶ jic anima' la ruc' ri jic ranima', c'o c'u na no'jibal la chuwäch ri c'o u no'jibal.

²⁷ Ri lal queto'tajisaj la ri caquimach' quib, cäkasaj c'u la qui k'ij ri cäquiban nimal.

²⁸ Lal, Ajawaxel, cäya' la nu chäj; lal nu Dios, cätununisaj la ri nu k'ekumalil.

²⁹ Ruc' ri to'banic la, quinch'äc ri c'ulel paquiwi c'ut ri e u tapia ri e u tinimit quinucoj wi na.

³⁰ Ri u be ri Ajawaxel, jicom; ri u tzij ri Ajawaxel takal u cu'bisaxic c'uxaj chrij; ¡ri Dios quebuch'uku ri cäquicu'ba' qui c'u'x chrij!

³¹ ¿Jachin ta ri Dios we ta ma ta are' ri Ajawaxel? ¿Jachin ta jun Dios chic ri cäcuin ta che ka ch'ukic?

³² Ri Dios are cäyo'w nu chuk'ab, are cäsuc'uman ri nu c'aslemal,

³³ ri cubano chi quinxiq'uinic jacha' jun masat, cubano chi man quintzak ta cho tak ri juyub,

³⁴ ri quinutijoj che u banic ch'o'j, ri cuya' nu chuk'ab che qui q'uiakic ch'ab re k'an ch'ich'.

³⁵ Ri lal quinch'uk la, quinto'tajisaj c'u la ruc' ri wiquiak'ab la; ri utzil la u banom chi utz in elinak.

³⁶ E pacom la ri nu be, rumal ri' man e jiljobinak ta ri wakan.

³⁷ Xebenwokataj ri e nu c'ulel, xebenrika', c'äte xintzelejic aretak xq'uis u sachic qui wäch.

³⁸ Xinban ch'akatak chque. Man xewalij ta chic. ¡Xekaj pa wakan!

³⁹ Lal xyo'w la nu chuk'ab pa ri ch'o'j; xban la chi ri nu c'ulel xquimej quib chnuwäch,

⁴⁰ xban la chi xebanimaj ri nu c'ulel chnuwäch. Jeri' xincuinic xinsach qui wäch ri cäquetzelaj nu wäch.

⁴¹ Are ta xcaj xeto' ta la, man c'o ta c'u jun xyo'w ta to'banic chque; xquisiq'uij ri Ajawaxel, man xutzelej ta u wäch qui tzij.

⁴² Xebenquie'j jacha' ri puc'uc' ulew ri cäc'am bic rumal quiakik'. ¡Xebenxak'alej jacha' ri t'ac ri e c'o pa tak ri be!

⁴³ Xinesaj la pa u k'ab jun tinimit ri man tal ta tzij, xban la chi xinux c'amal qui be nimak tak tinimit, xinquipatanij winak ri man weta'm ta qui wäch.

⁴⁴ Aretak cäquita' ri nu ch'abal queniman chwe; winak ri man e nu winakil taj cäquiya' nu k'ij,

⁴⁵ ri winak ri man e nu winakil ta cäquixe'j quib quebirbitic quebel ulok pa tak ri to'bal quib.

⁴⁶ ¡C'asal ri Ajawaxel!, ¡tewichital ri ch'ukul wech! ¡Chyok u k'ij ri Dios ri nu Colonel!

⁴⁷ Are Dios wa' ri cäc'äjisan qui wäch ri qui banom qui c'ulel chwe xebujach tak ri tinimit chuxe' ri nu takanic.

⁴⁸ Quinucol chuwäch ri coyowal ri nu c'ulel, xukuje' pa qui k'ab ri xquiyac quib chwij. ¡Ri lal Ajawaxel, quinto' la pa qui k'ab ri winak ri e tokinelab!

⁴⁹ Rumal ri' quinya' k'ij la pa ri nimak tak tinimit quinbixoj bix che ri bi' la.

⁵⁰ Quebeya' la nimak tak ch'äcanic che ri ajawinel ri cha'om la; amak'el quel c'u'x la che ri David xukuje' ri e rija'lil.