Salmib 17 - Quiché Bible

Ch'awem che u tz'onoxic suq'uilal

¹ Ajawaxel, kas suc' u tatabexic ri nu c'ulmam bana' la, choc la il che ri nu bochi'nic, tatabej la ri nu ch'awem uc' la, man quel ta c'u ulok chuchi' banal tzij.

² ¡Lal chk'ata la tzij panuwi', Lal eta'm la jachique ri suc'!

³ Oquinak la chupam ri nu chomanic; chak'ab lal petinak che nu c'ac'alexic; in c'ambejem la ruc' k'ak', man c'o ta c'u etzelal rikom ta la pa nu c'aslemal. Man e nu bim ta jastak ri man ya'tal ta qui bixic,

⁴ jacha' cäquiban ri niq'uiaj winak chic; nu najtajisam wib chque tak ri qui be ri tokinelab, nu banom ri cubij ri takanic la.

⁵ Jicom in bininak pa tak ri be la; mawi jumul e nu tzakom ta canok.

⁶ Oh Dios, uc' la quinch'aw wi, weta'm chi cätzelej la u wäch ri nu tzij, ya' ri xiquin la che nu tatabexic, chetatabej tak la ri e nu tzij.

⁷ Ya' la jun k'alajalaj c'utbal re ri lok'ok'ebal c'u'x la chwe, lal, ri queto'tajisaj la pa qui k'ab ri qui c'ulel chque ri caquitzucuj ri ch'ukubal quib pa ri cuinem la.

⁸ Chinchajij la jacha' ri qui chajixic ri qui c'u'x ri bak'wäch la, chinch'uku la chquixe' ri e qui mu'jal ri e xic' la

⁹ pa qui k'ab ri banal tak etzelal ri e walijinak chwij, ¡pa qui k'ab ri c'ulel ri qui sutim wij cäcaj quinquicämisaj!

¹⁰ E nojinak che etzelal, cäquibij tzij che u nimarisaxic quib;

¹¹ quiterenem ri u xo'l wakan, queyem jampa' quinquikasaj pa ulew.

¹² Je ri quepe coj, c'analaj tak coj, qui c'olom quib pa ri qui pec quejik'jatic queyem jampa' cäquiq'uiak quib.

¹³ Walija la, Ajawaxel, ¡chk'atij la qui wäch!, ¡chemejmobisaj la ri qui ch'ec! Ruc' ri ch'ich' re ch'o'j la chinto'tajisaj la rech man quinkaj ta pa u k'ab ri banal etzelal;

¹⁴ ruc' ri cuinem la, Ajawaxel, chinto' la rech man quinkaj ta pa qui k'ab, ¡chebesaj la bic cho we uwächulew ri', ri are quechbal pa we c'aslemal ri'! Chya' la be chque chi quenoj chque tak k'inomal, chi chewok tak ri calc'ual c'ä chepok' na, xukuje' c'ä chto'taj na can chque tak ri qui' tak qui mam.

¹⁵ Are c'u ri in, kastzij cäcu'bi nu c'u'x ruc' ri rilic rib ka wäch uc' la, ¡ruc' ri nu c'olem chwäch la aretak chinc'astajic!