Salmib 16 - Quiché Bible

Man c'o ta chi jun echbal ri utz ta na

¹ ¡Chinchajij la, oh Dios, uc' la quintzucuj wi u ch'ukic wib!

² Nu bim c'u che la: “Lal ri Wajaw, ri wutzil; man c'o ta ri cajunamataj ta wi la.”

³ Ri e diosib ri e c'o pa ri ulew c'o qui cuinem, jewa' caquibij ri quequicot cuc'.

⁴ Are c'u ri cäquiterenej diosib caquirik na sibalaj c'ax. ¡Are c'u ri in mawi jumul quinjunaj ta wib cuc' che quicojic ri quiq'uelalaj tak qui tabal tok'ob! ¡Mawi jumul quenatax ta ri e qui bi' cumal ri e nu chi'!

⁵ Lal Ajawaxel, lal ri lal ronojel chwe; quinnojisaj la che tewichibal, ri nu c'aslemal pa k'ab la c'o wi.

⁶ Je'lalaj c'olbal nu rikom; ¡utzalaj echbal xya'taj chwe!

⁷ Quinya' u k'ij ri Ajawaxel rumal chi are' c'amal nu be, cupixbej ri wanima' chak'ab.

⁸ Amak'el natal ri Ajawaxel chwe; c'o ri are' pa nu wiquiak'ab man c'o ta quintzakow na.

⁹ Rumal ri' cänoj ri wanima' che quicotemal. Quinuxlan pa utzil, man c'o ta jas quinoc ta wi il.

¹⁰ Man quinya' ta la canok chupam ri mukubal, ¡man cawonoba' ta la canok pa ri mukubal ri jicalaj achil ib la ruc'!

¹¹ Cäc'ut la ri be re c'aslemal chnuwäch. C'o nimalaj quicotemal uc' la; c'o junalic utzil chnakaj la.