Salmib 148 - Quiché Bible

Ronojel ri e banom rumal cuya' u k'ij ri Ajawaxel

¹ ¡Chyo'k u k'ij ri Ajawaxel! ¡Chk'ijilax ri Ajawaxel kas pa ri caj! ¡Chk'ijilax ri Ajawaxel kas pa ri chicajil!

² ¡Chik'ijilaj ix iwonojel ri ix u tako'n aj caj! ¡Chik'ijilaj ix, ri ix ajch'ojab aj chicaj!

³ ¡Chik'ijilaj ix, k'ij xukuje' ic'! ¡Chik'ijilaj ix, juluwemalaj tak ya'l sakilal!

⁴ ¡Chak'ijilaj at aj chicajalaj caj, xukuje' at ja' ri at c'o puwi' ri caj!

⁵ Chiya' u k'ij ri u bi' ri Ajawaxel, are c'u ri are' xuya' jun takanic, ronojel c'ut xebantajic;

⁶ ronojel xujekeba' ri are' rech cäcanaj amak'el, xuya' jun pixab ri mawi jubik' cäyojixic.

⁷ ¡Chk'ijilax ri Ajawaxel kas cho ri ulew, jilijak tak awaj aj plo, xukuje' ri u choil ri plo!

⁸ ¡Ri cakulja, ri sakbach, ri sakalaj tew xukuje' ri mayul! ¡Ri quiakik' ri cäjich'ich'ic ri cunimaj ri u takanic!

⁹ ¡Ri e juyub xukuje' ri e u tza'm tak juyub! ¡Conojel ri chacalte' xukuje' tak ri che' ri quequiya' tak qui wäch!

¹⁰ ¡Ri awaj e aj uwo tak ja xukuje' ri e juyubal tak awaj! ¡Ri chicop ri c'o qui xic' xukuje' ri caquijuruj tak quib!

¹¹ ¡Ri ajawinelab ri e c'o cho ri uwächulew xukuje' conojel tak ri tinimit! ¡Conojel ri c'amal tak be xukuje' ri k'atal tak tzij ri e c'o cho ri uwächulew!

¹² ¡Achijab, ixokib, ac'alab xukuje' ri'jab!

¹³ ¡Iwonojel chiya' u k'ij ri u bi' ri Ajawaxel, xuwi c'ut ri u bi' sibalaj aj chicaj! ¡Ri u juluwem c'o puwi' ri caj xukuje' puwi' ri ulew!

¹⁴ Ri are' u yo'm cuinem pa u k'ab ri u tinimit. ¡Chyo'k u k'ij cumal conojel ri jic quebin chuwäch, cumal ri aj israelib, ri u tinimit ri c'o nakaj! ¡Chyo'k u k'ij ri Ajawaxel!