Salmib 147 - Quiché Bible

Man je ta xuban wa' chque conojel ri nimak tak tinimit

¹ ¡Chyo'k u k'ij ri Ajawaxel! ¡Sibalaj utz qui bixoxic bix che ri ka Dios! ¡Che ri are' rajawaxic queya' qui'laj tak bix!

² Ri Ajawaxel cuban u banic ri Jerusalen, quebumulij conojel ri aj israelib ri e jubuninak.

³ Ri are' quebucunaj ri pak'pobinak canima', quebubotz' c'u ri qui socotajic.

⁴ Ri are' reta'm ri cajilabal ri ch'imil, chquijujunal c'ut xucoj ri qui bi'.

⁵ Nim u banic ri ka Dios xukuje' nim ri u cuinem; ri retamanic man c'o ta u q'uistajic.

⁶ Ri Ajawaxel cuya' qui k'ij ri e mach'amoj, quebuxucule'j c'ut ri e banal tak etzelal cho ri ulew.

⁷ Chixbixon che ri Ajawaxel ruc' maltioxinic; chibixoj bix che ri ka Dios, ruc' rok'ibal arp.

⁸ Ri are' cuch'uk ri caj ruc' ri sutz', cucolomaj ri jäb che ri ulew, quebuq'uiyisaj ri k'ayes pa tak ri juyub,

⁹ quebutzuk ri awaj xukuje' ri alaj tak cal ri joj aretak quebok'ic.

¹⁰ Man are ta ri u chuk'ab ri quiej mawi ri e u ch'ec ri winak ri sibalaj quekaj ta chuwäch ri Ajawaxel;

¹¹ are nim queril wi ri queyo'w u k'ij; ri caquijiquiba' qui c'u'x chrij ri u lok'ok'ebal u c'u'x.

¹² Jerusalen, chak'ijilaj ri Ajawaxel; Sion, chaya' u k'ij ri a Dios.

¹³ Xebucowirisaj c'u ri e u laweyil tak ri awoquibal, xebutewichi'j c'ut ri e a c'ojol chupam ri tinimit.

¹⁴ Ri are' cuc'am ulok ri jamaril chupam ri awulew, xukuje' catutzuk ruc' ri trico ri sibalaj utz na.

¹⁵ Ri are' cutak ulok ri u tzij cho ri uwächulew, ruc' c'u aninakil cäjubun ronojel ri u tzij.

¹⁶ Cuq'uiyisaj ri tew jacha' ta ne rismal chij, ri cujabuj ri sakalaj tew ri jacha' ta ne puc'uc' ulew.

¹⁷ Ri cutak ulok ri sakbach ri u tewerisam; ruc' ri tew ri cutak ulok, ¿jachin ta ri cacuinic cataq'ui ta canok?

¹⁸ Cutak c'u ulok ri u tzij cujarisaj c'ut; cubano chi cajich'ich' ri quiakik' cäbin c'u ri ja'.

¹⁹ Ri are' xuya' retamaxic che ri Jacob, che ri Israel, ri u tzij, ri e u pixab xukuje' ri e u colomibal.

²⁰ Man junam ta xuban cuc' jule' nimak tak tinimit chic ri mawi jubik' xquetamaj ri e u colomibal. ¡Chyo'k u k'ij ri Ajawaxel!