Salmib 146 - Quiché Bible

K'ijilanic cumal ri e u banom ri Dios

¹ Chyo'k u k'ij ri Ajawaxel. Quinya' u k'ij ri Ajawaxel ruc' ronojel ri nu c'aslibal.

² Quinya' u k'ij ri Dios joropa' k'ij ri quinc'asi' na; quinbixoj na bix che ri nu Dios joropa' k'ij quinc'oji' na.

³ Mebijiquiba' i c'u'x chquij tak winak ri nimak qui k'ij, chquij winak ri man c'o ta qui banic ri man quecuin ta queto'tajisanic,

⁴ aretak c'u quecämic quetzelej kas pa ri puc'uc' ulew, kas c'u pa ri k'ij ri' quequitanaba' qui banic ri e qui banoj.

⁵ Sibalaj utz rech ri cuc'am ri u to'banic ri u Dios ri Jacob, ri queyem che ri Ajawaxel ri u Dios.

⁶ Are' xbanow ri caj, ri ulew, ri plo, xukuje' conojel ri e c'o chquipam. Ri are' amak'el u jekebam ri u tzij.

⁷ Cuban suq'uil chque ri e c'o pa c'axc'olil, quebutzuk c'ut ri e c'o pa wi'jal. Ri Ajawaxel quebutor ri e tz'apitz'oj;

⁸ ri Ajawaxel cutzelej chi jumul ri qui bak'wäch ri moyab; ri Ajawaxel quebuwalijisaj ri e tzakinak; ri Ajawaxel quebulok'ok'ej ri winak ri e tz'akatisanelab pa ronojel;

⁹ ri Ajawaxel quebuch'uku ri e re jun tinimit chic, ri minorib xukuje' ri malca'nib, cuban c'ut chi ri e banal tak etzelal caquisach ri qui be.

¹⁰ At Sion, ri Ajawaxel cajawin na chbe k'ij sak; ri a Dios cajawin na conojel tak ri k'ij junab. ¡Chyo'k u k'ij ri Ajawaxel!