Salmib 145 - Quiché Bible

Chi ronojel winak chuya' u k'ij ri Ajawaxel

¹ Quintzijoj na chi sibalaj nim banic la, nu Dios Wajawinel; quintewichi'j na ri bi' la amak'el.

² Ronojel k'ij quintewichi'j na la; quink'ijilaj na ri bi' la amak'el.

³ Ri Ajawaxel nim u banic, sibalaj takal che cäya' u k'ij; ri u nimalil coc'ow na chuwäch ri ketamanic.

⁴ Chi ija'lil chi ija'lil quequiya' na qui k'ij tak ri e banoj la, quequiya' c'u na qui tzijol ri cuinelalaj tak banoj la chquixo'l.

⁵ Catzijox na ri juluwemalaj nimalil la, are c'u ri in quebentzijoj na ri e mayibal tak la.

⁶ Quetzijox na ri nimak xukuje' ri xibibalalaj tak jastak ri e banom la, in quintzijoj na ri nimalil la.

⁷ Cätzijox na ri nimalaj utzil la, cuc' rakoj tak chi'aj cäbix na chi lal suc'.

⁸ Ri Ajawaxel ch'uch'uj xukuje' quel u c'u'x; c'o u coch'onic, ronojel c'ut lok'ok'ebal c'uxaj.

⁹ Ri Ajawaxel utz cuc' conojel, ruc' c'u ch'uch'ujil quebuchajij ri e u chac.

¹⁰ Ajawaxel, ¡chyo'k k'ij la cumal conojel tak ri chac la! ¡tewichi'x la cumal tak ri e jic quebin chwäch la!

¹¹ ¡Quitzijoj ri juluwemalaj ajawibal la! ¡Chquesaj u tzijol ri cunelalaj tak banoj la!

¹² ¡Chyo'k retamaxic ri cuinem la chque tak ri winak, xukuje' ri juluwemalaj ajawibal la!

¹³ Ri ajawibal la are jun ajawibal re chbe k'ij sak, ri k'ijinic la re k'ij junab.

¹⁴ Ri Ajawaxel quebutok'ej ri quetzaklobic, quebuwalijisaj ri quetukaric.

¹⁵ Ri qui bak'wäch conojel quebeyen che la cäya' c'u la ri qui wa pa ri u k'ijol.

¹⁶ Quejak ri k'ab la, ruc' c'u utzalaj rayibal la quetzuk la conojel ri e c'asc'oj.

¹⁷ Ri Ajawaxel suc' pa tak ri e u be, banal utzil pa tak ri cubano.

¹⁸ Ri Ajawaxel, nakaj c'o wi chque ri cäquinataj ri u bi', ri cäquinataj ri u bi' ruc' ronojel canima'.

¹⁹ Ri are' cutz'akatisaj ri qui rayibal ri q'ueyo'w u k'ij; aretak cäquitz'onoj ri u to'banic, quebuto', quebucolo.

²⁰ Ri Ajawaxel quebuch'uku ri quelok'ok'en che, are c'u ri e banal tak etzelal, cusach qui wäch.

²¹ ¡Ri nu chi' chuya' u k'ij ri Ajawaxel! ¡Conojel chquiya' u k'ij ri tastalicalaj u bi', camic xukuje' c'ä chbe k'ij sak!