Salmib 144 - Quiché Bible

U maltioxinic jun ajawinel che ri Dios

¹ Tewichital ri Ajawaxel, ri ch'ukul wech. Are' quintijonic qui nu colomisaj c'ut che u banic ri ch'o'j;

² are' ri jicalaj wachil, ri nu c'olbal ri quinch'uw wi wib, ri c'ubal wib ri naj elinak chicaj, ri nu toronel; are' nu quetequic ch'ich', ruc' are' quinch'uw wi wib; are' quecojow tak ri tinimit chuxe' ri nu takanic.

³ Ajawaxel, ¿jas u banic ri winak rech cächoman la chrij? ¿Jas u banic ri winak aj uwächulew chi sibalaj nim quil wi la?

⁴ Ri winak xa je jacha' jun uxlabic; ri u c'aslemal jacha' jun nanoch' ri coc'owic.

⁵ Ajawaxel, jolo' la ri k'atibal qui wäch ri caj, chk'aj c'u la ulok; slabej la ri juyub rech quequesaj sib;

⁶ cheq'uiaka' tak ri ch'ab la, ri e caypa', bana' la chi ri e c'ulel la qui jabum quib quebanimajic.

⁷ Yuku' la ulok ri k'ab la chicaj, chinesaj la chupam ri choalaj plo; chinesaj la pa qui k'ab ri winak ri man weta'm ta qui wäch,

⁸ ri quequibij banoj tak tzij cäquiyac c'ut ri qui k'ab quiquiak'ab che u bixic ri chi'nic ri kas cäban na xa c'u che subunic.

⁹ Ajawaxel, quinbixoj jun c'ac' bix che la; quebenbixoj bix che la ruc' ri nimalaj arp.

^10-11 Lal ri cäya' la ch'äcanic chque tak ri ajawinelab; lal, ri xto'tajisaj la ri David ri pataninel ech la, chinesaj la chuwäch ri ch'ich' re ch'o'j ri cäcämisanic; chinesaj la pa qui k'ab ri winak ri man weta'm ta qui wäch, ri quequibij banoj tak tzij cäquiyac c'ut ri qui k'ab quiquiak'ab che u bixic ri chi'nic ri kas cäban na xa c'u che subunic.

¹² Ri e ka c'ojol queq'uiyic jacha' jujun tico'n chupam jun ticonijibal; ri e ka mia'l e je ta ne rakan tak ja ri banom quetz'balil ri quetok'en ri u wi' ri rachoch Dios.

¹³ Ri e ka c'uja e nojinak e xaninak che ronojel u wäch k'obisabal. Ri e ka chij sibalaj quepok' pa tak mil, e mil chi mil e c'o pa tak ri ka juyub.

¹⁴ Ri e ka wacax ri e c'o chi qui tu' mawi jumul quetzakanic. Man e c'o ta rakoj tak chi'j re cojol tak xib.

¹⁵ ¡Utz rech ri tinimit ri e c'o ronojel wa' ruc'! ¡Utz rech ri tinimit ri are' u Dios ri Ajawaxel!