Salmib 143 - Quiché Bible

Chij la nu jiquibam wi nu c'u'x

¹ Ajawaxel chtatabej la ri nu ch'awem uc' la; choc la il che ri nu bochi'nic. ¡Tzelej la u wäch ri nu tzij, lal c'u suc' xukuje' jic!

² Mäsiq'uij la ri pataninel ech la rech cajilaj la ri u mac chrij, man c'o ta c'u jun chwäch la ri ma ta c'o u mac.

³ Ri e nu c'ulel in quiterenem pa wakan; in qui xak'alem cho ri ulew; caquicoj chuk'ab chwe chi chinjekel chupam ri k'ekumalil jacha' ri e cäminak ojer.

⁴ Kas in c'o chupam ri latz'; quel ch'u'j ri wanima'.

⁵ Quenataj ri ojer tak k'ijol chwe, quinchoman chrij ronojel ri banom la.

⁶ Quebenyuk apan ri nu k'ab che la, cächaki'j nu chi' che la, jacha' ri chaki'j ulew.

⁷ Ajawaxel, ¡tzelej la ulok u wäch ri nu tzij aninak, cätajin caq'uis ri wuxlab! Mak'il la ri to'banic la chwe, quinux c'u na ri' e jacha' ri cäminakib.

⁸ Ak'abibal chya' la retamaxic ri lok'ok'ebal c'u'x la chwe, nu jiquibam c'u nu c'u'x chij la. Chya' la retamaxic chwe jachique ri c'aslemal ri rajawaxic ruc'axic wumal, che la c'ut quintz'onoj wi ri curayij ri wanima'.

⁹ Ajawaxel, chinesaj la pa qui k'ab ri e nu c'ulel, rumal rech chi uc' la quintzucuj wi panibal.

¹⁰ Chc'utu' la chnuwäch ri u banic ri rayibal la, lal c'ut ri nu Dios. ¡Are' ta ba' ri utzalaj uxlabal la chinc'amow bic chupam jun suc'alaj be!

¹¹ Rumal ri bi' la, Ajawaxel, ¡bana' la chi quinc'asi'c! rumal rech chi lal suc', ¡chinesaj la chupam ri c'axc'olil!

¹² Rumal rech chi lal jic ¡sachisaj la qui wäch ri e nu c'ulel! ¡sachisaj la qui wäch conojel ri e nu c'ulel, in c'u pataninel ech la!