Salmib 142 - Quiché Bible

Lal ri nu panibal

¹ Ruc' cowilaj rakoj chi'aj quintz'onoj ri u to'banic ri Ajawaxel, ruc' cowilaj rakoj chi'aj quintz'onoj elebal c'u'x che.

² Chuwäch quintzujun wi, chuwäch quinya' wi retamaxic ri nu c'axc'ol,

³ aretak kas in c'o chupam ri latz'obal. Ajawaxel, lal etamam la ri nu be: chupam ri be ri in benak wi, qui cojom jun c'amibal chwe.

⁴ Quinca'y pa nu wiquiak'ab man c'o ta c'u jun cäpe ta che nu to'ic. ¡Man c'o ta jachin jun cuto' ta nu wi'! ¡Man c'o ta jachin jun coc ta il chwe!

⁵ Che la Ajawaxel quintz'onoj wi tok'ob, quinbij c'u che la: “Lal ri' ri nu panibal; lal ronojel ri c'o wuc' pa we c'aslemal ri'.”

⁶ Chya' la ri xiquin la che qui tatabexic ri nu rakoj chi'aj, man e c'o ta chi c'u nu chuk'ab. Chinesaj la pa qui k'ab ri in quiterenem pa wakan c'o c'u na qui chuk'ab chnuwäch in.

⁷ Chinesaj la pa ri ximibal ri in c'o wi rech quincuinic quink'ijilan che la. Ri winak ri e tz'akatisanelab pa ronojel cäquimulij na quib chwij aretak nu rikom chic utzil umal la.