Salmib 141 - Quiché Bible

Ri e nu bak'wäch e nu yo'm chij la

¹ Che la quintz'onoj wi tok'ob, Ajawaxel: ¡saj ba la chanim!, ¡chtatabej la ri nu ch'abal aretak canatax la wumal!

² Ri nu ch'awem uc' la je chuxok jacha' ri c'oc'alaj k'ol chwäch la, e yactal c'ut ri e nu k'ab, jacha' sipanic rech benak k'ij.

³ Ajawaxel, cojo' la jun yuxlenel chi nu chi', ri cächajinic rech man quebenjak ta ri nu chi'.

⁴ Najtajisaj la ri nu chomanic che ri etzelal; mäya' la chwe chi quebenban itzel tak banoj, mawi chi quinwa' ta cuc' ri e banal tak etzelal.

⁵ Are jun tok'ob chwe chi ri winak tz'akatisanel pa ronojel cuc'äjisaj nu wäch, jun je'lalaj c'oc'al c'ut ri quink'ilowic. We jastak ri' man quebenpakchi'j taj; pune' quinquit'oco, quitakej na u banic ch'awem ruc' Dios.

⁶ Ri e c'amal tak qui be ri e banal etzelal, quech'iquimix na bic chi' siwan, quequil c'u na chi ri e nu tzij e je'lic.

⁷ Ri e qui bakil quejabux na chuxcut ri mukubal, jacha' aretak quejak bolaj pa ri ulew.

⁸ Ajawaxel, Ajawaxel, ri e nu bak'wäch e nu yo'm chij la. Uc' la quintzucuj wi u ch'ukic wib, minwonoba' la canok.

⁹ Chinesaj la chuwäch ri c'amibal ri cojom pa ri nu be; chinesaj la chuwäch ri qui c'amibal ri itzel tak winak.

¹⁰ Chekaj ri banal tak etzelal chupam ri kas qui c'at, quintakej c'u na binem in.