Salmib 140 - Quiché Bible

Ch'awem chuto'ic ch'ukubal ib ruc' ri Dios

¹ Ajawaxel, chinesaj la pa qui k'ab ri banal tak etzelal; chinch'uku la chquiwäch ri ch'ujab,

² ri cäquichomaj u banic ri man utz ta amak'el c'ut quetzurun che ch'o'j.

³ Tz'ipitz'ic ri cak' jacha' ri rak' cumätz; ri e qui tzij e junam ruc' ri e u ware ri sachoj.

⁴ Ajawaxel, chinch'uku la pa qui k'ab ri e banal tak etzelal, chinto' la pa qui k'ab ri e banal tak etzelal, ri quequiban tak chomanic rech quintzakic.

⁵ We e banal tak nimal ri' qui cojom jun c'amibal; e quilic'om c'at xukuje' tak colob chnuwäch; e qui cojom tak c'amibal chwe chunakaj ri be.

⁶ Nu bim che ri Ajawaxel: “Lal ri lal nu Dios; ¡chtatabej ba la ri nu rakoj chi'aj ri cutz'onoj tok'ob!

⁷ Ajawaxel, Ajawaxel, nu colonel ri c'o u cuinem, lal cäch'uw la ri nu jolom chupam ri ch'o'j.”

^8-9 Ajawaxel, mäya' la che ri banal etzelal chi quebantaj ri e u rayinic; mäya' la be chi quetaken ri e u chomanic. Ri qui sutim wij, caquiwalijisaj ri qui jolom; ¡chkaj paquiwi' ri c'okonic ri caquiq'uiako!

¹⁰ Chekaj rachak k'ak' paquiwi' ri quekakatic; cheq'uiak pa tak jul jawije' ri man quebel ta chi wi ulok.

¹¹ Ri winak ri nim rak' mutakej jekelem cho ri uwächulew; chterenex ri ch'u'j u jolom, rumal ri etzelal, chsachisax c'u u wäch rumal.

¹² In weta'm chi ri Ajawaxel cuban suq'uil che ri meba', cuto' c'u u wi' ri ch'ibatajinak.

¹³ Ri winak ri e tz'akatisanelab pa ronojel cäquiya' na u k'ij ri bi' la; ri winak ri e suc' quejeki' na chwäch la.