Salmib 139 - Quiché Bible

Ri Dios reta'm ronojel

¹ Ajawaxel, lal in nic'om la xukuje' eta'm la nu wäch;

² lal eta'm la ronojel ri quinbano; pune' naj in c'o wi cäch'ob la ri quinchomaj.

³ E eta'm la ronojel ri e u be wakan, ¡eta'm la ronojel ri quinbano!

⁴ C'ä majok ne chc'ol ri tzij puwi' ri wak', ri lal, Ajawaxel, etamam chi la.

⁵ Pa ronojel sutim wi la wij; yo'm la ri k'ab la panuwi'.

⁶ Ri no'j ri sibalaj cajmajibal man ya'tal ta u rikic wumal; ¡sibalaj jutac'aj chi man quinrik ta u ch'obic!

⁷ ¿Jawije' ta ri quincuinic quinbe wi, naj che ri uxlabal la? ¿Jawije' ta ri quinanimaj wi bic, ri ma ta quinil la?

⁸ We ta quinpaki' c'ä paquiwi' ri caj, chila' lal c'o wi, we ta quinkaj c'ä chuxe' ri ulew, xukuje' lal c'o chila';

⁹ we ta quinrapinic quinbe pa elebal k'ij, o quinec'ol ta c'ä chuchi' ri plo ri c'o pa ri u kajebal k'ij,

¹⁰ xukuje' ne chila' quinurika' wi na ri k'ab la; ¡ri k'ab la ri iquiak'ab man quinutzokopij ta ri'!

¹¹ We ta quinchomaj u c'u'ic wib chupam ri k'ekumalil, we ta cux c'u chak'ab ri sakil ri sutininak wij,

¹² ri k'eku'm man cäcuin ta ri' quinuc'u' chwäch la; ¡xak junam ri k'ekumalil xukuje' ri sakilal che la!

¹³ Lal xnuc'uw la ronojel ri nu cuerp; lal xinnuc'uw chupam ri u c'u'x ri nu nan.

¹⁴ Quinya' k'ij la rumal rech chi in mayibaninak, rumal rech chi sibalaj mayibal ri banom la. ¡Kas ilinak c'u chisak chnuwäch!

¹⁵ Man xc'utaj ta chwäch la ri u q'uiyic ri nu cuerp, chic'uyal aretak cätajin canuc' chupam ri ulew.

¹⁶ Ri bak'wäch la xril ri nu cuerp aretak cätajin cäq'uiyic; ronojel wa' tz'ibatal pa ri wuj la. C'utum chi la joropa' k'ij quinc'asi'c aretak c'ä maja' c'o jun chque.

¹⁷ Nu Dios, sibalaj e naj qui pam ri e chomanic la chwe; ¡man quebajilataj ta chnimalaj conojel!

¹⁸ We ta quinwaj quebenwajilaj, c'o na cajilabal ri' chuwäch ri sanyeb; we ta c'u ne quintastajic, c'ä in c'o na ri' uc' la.

¹⁹ Nu Dios, chesaj la ri qui c'aslemal ri banal tak etzelal, chenajtajisaj c'u la chwe ri cämisanelab,

²⁰ ri c'ax quech'aw che la, xak c'u lok' cäquiyac quib chij la.

²¹ Ajawaxel, ¿La ma ta quinban woyowal chque ri caquiban coyowal che la xukuje' quinwetzelaj qui wäch ri man caquicu'ba' ta qui c'u'x chij la?

²² ¡Ruc' ronojel nu c'aslibal quinwetzelaj qui wäch! ¡Quinchomaj chi qui banom qui c'ulel chwe!

²³ Nu Dios, chinnic'oj la chetamaj la u wäch ri wanima'; chinc'ambejej la, chetamaj la qui wäch ri e nu chomanic;

²⁴ chila la we in benak chupam ri be re etzelal, c'ama' c'u la nu be chupam ri junalic be.