Salmib 138 - Quiché Bible

U ya'ic maltioxinic che ri Ajawaxel

¹ Quinya' na maltioxinic che la, Ajawaxel, ruc' ronojel wanima' quebenbixoj na bix che la chquiwäch ri e c'o pa ri caj.

² Quinxuqui' na chusuq'uil ri tastalicalaj achoch la, che u ya'ic maltioxinic che la rumal ri lok'ok'ebal c'u'x la xukuje' ri kastzij la, nu cojom c'u ri bi' la xukuje' ri tzij la paquiwi' conojel ri jastak.

³ Aretak xinsiq'uin che la xtzelej la ulok u wäch ri nu tzij, xukuje' xya' la u wi' ri nu chuk'ab.

⁴ Conojel ri ajawinelab cho ri uwächulew cäquiya' na k'ij la aretak cäquita' ri tzij la.

⁵ Cäquiya' na u k'ij ri Ajawaxel rumal ri u chomam u banic, nim c'u ri u juluwem ri Ajawaxel.

⁶ Pune' chicaj c'o wi ri Ajawaxel, coc il che ri winak ri mach'alic, cuch'ob c'u u wäch ri banal nimal chinaj.

⁷ Aretak quinriktaj chupam ri sayowem, ri lal cäya' la nu c'aslemal; calic' ri cuinem la quinto'tajisaj c'u la, chuwäch ri coyowal ri e nu c'ulel.

⁸ ¡Ri Ajawaxel cuban na ronojel ri u chomam che nu to'ic! Ajawaxel, ri lok'ok'ebal c'u'x la junalic; ¡mäch'akapij la canok ri chaplem la u banic!