Salmib 137 - Quiché Bible

Chquinakaj tak ri nima' re Babilon

¹ Uj t'uyul chquinakaj ri nima' re Babilon, cujok'ic aretak cänataj ri Sion chke.

² Chque ri sak lemob ri e c'o chupam ri tinimit quekatzayiba' la' wi tak ri ka arp.

³ Chila', ri xujquic'am ulok che patanijic ri xetokin ronojel chke, caquitz'onoj chke chi chujbixon ruc' quicotemal; ¡chi chekabixoj bix aj Sion chquiwäch!

⁴ ¿Che ri uj quekabixoj bix rech ri Ajawaxel pa jun ulew ri man kulew taj?

⁵ ¡We catinsach pa nu jolom, Jerusalen, chmatz'ir ri nu k'ab wiquiak'ab!

⁶ ¡Chunac'a' rib ri wak' pa nu chi' we man catnataj chwe; we man catincojo, Jerusalen, puwi' ri kas nu quicotemal!

⁷ Ajawaxel, chenataj ri aj edomib che la, chi aretak xch'äctaj ri Jerusalen, xquibij: “¡Chiwulij, chiwulij, chebiwolkotij apan ri e u tac'alibal!”

⁸ ¡At Babilon, catwulix na! ¡Utz rech ri cayo'w chawe ri takal chawe u mac rech ri xaban chke!

⁹ ¡Utz rech ri quebuchap tak ri e awalc'ual, quebujabuj c'u cho tak ri abaj!