Salmib 136 - Quiché Bible

Junalic u lok'ok'ebal c'u'x ri Dios che ri Israel

¹ Chebiya' maltioxinic che ri Ajawaxel, utz c'ut ri are', junalic c'ut ri u lok'ok'ebal c'u'x.

² Chebiya' maltioxinic che ri Dios ri c'o paquiwi' conojel ri diosib, junalic c'ut ri u lok'ok'ebal c'u'x.

³ Chebiya' maltioxinic che ri Cajaw ajawib; junalic c'ut ri u lok'ok'ebal c'u'x.

⁴ Che ri xuwi ri are' ri quebuban nimak tak mayibal junalic c'ut ri u lok'ok'ebal c'u'x.

⁵ Che ri xebanow ri caj ruc' no'jinic, junalic c'ut ri u lok'ok'ebal c'u'x.

⁶ Che ri xlic'ow ri ulew paquiwi' tak ri ja', junalic c'ut ri u lok'ok'ebal c'u'x.

⁷ Che ri xbanow ri k'ij xukuje' ri ic', junalic c'ut ri u lok'ok'ebal c'u'x:

⁸ Ri k'ij rech cätunun pa k'ij, junalic c'ut ri u lok'ok'ebal c'u'x.

⁹ Ri ic', xukuje' ri ch'imil rech quetunun chak'ab, junalic c'ut ri u lok'ok'ebal c'u'x.

¹⁰ Che ri xecämisan conojel ri e qui nabeal ri aj ejiptib, junalic c'ut ri u lok'ok'ebal c'u'x.

¹¹ Che ri xebesan ulok ri aj israelib pa Ejipt, junalic c'ut ri u lok'ok'ebal c'u'x;

¹² xulic' ri u k'ab ruc' nimalaj cuinem, junalic c'ut ri u lok'ok'ebal c'u'x.

¹³ Che ri xuban quieb che ri Quiäk Plo, junalic c'ut ri u lok'ok'ebal c'u'x.

¹⁴ Che ri xroc'owisaj ri Israel pa u niq'uiajil ri plo, junalic c'ut ri u lok'ok'ebal c'u'x.

¹⁵ Che ri xbik'tajisan ri paraon chupam ri Quiäk Plo xukuje' ri e rajch'ojab. Junalic c'ut ri u lok'ok'ebal c'u'x.

¹⁶ Che ri xuc'am u be ri u tinimit pa ri chaki'j uwo sak, junalic c'ut ri u lok'ok'ebal c'u'x.

¹⁷ Che ri xebusoc che cämical ri nimak tak ajawinelab, junalic c'ut ri u lok'ok'ebal c'u'x.

¹⁸ Che ri xresaj qui c'aslemal ri ajawinelab ri c'o qui cuinem, junalic c'ut ri u lok'ok'ebal c'u'x,

¹⁹ ri Sehon, ajawinel amorey; junalic c'ut ri u lok'ok'ebal c'u'x.

²⁰ Xukuje' ri Og, ajawinel re Basan, junalic c'ut ri u lok'ok'ebal c'u'x.

²¹ Che ri xujach ri culew we ajawinelab ri' chquiwäch, junalic c'ut ri u lok'ok'ebal c'u'x,

²² xuya' c'u che rechbal ri Israel ri pataninel rech, junalic c'ut ri u lok'ok'ebal c'u'x.

²³ Che ri cujnataj che aretak uj tzakinak, junalic c'ut ri u lok'ok'ebal c'u'x.

²⁴ Che ri cujesan pa qui k'ab ri e ka c'ulel, junalic c'ut ri u lok'ok'ebal c'u'x.

²⁵ Che ri quetzukuw ri winak xukuje' ri awaj, junalic c'ut ri u lok'ok'ebal c'u'x.

²⁶ ¡Chiya' maltioxinic che ri Dios aj caj, junalic c'ut ri u lok'ok'ebal c'u'x!