Salmib 132 - Quiché Bible

Ri e u chi'nic ri Dios che ri David

^1-2 Ajawaxel, Ajawaxel, cuinel che ri Jacob, chnataj ri David che la xukuje' tak ri e u c'axc'ol; chnataj che la ri cowilaj chi'nic ri kas cäban na, ri xcha' che la:

³ “Man quinoc ta pa ja, mawi quink'oyi' che uxlanem;

⁴ man quintz'apij ta ri nu bak'wäch mawi xa ta ne jubik' quinwaric,

⁵ c'ä quinrik na ja che ri Ajawaxel ri c'o u cuinem che Jacob.”

⁶ Pa Eprat xkata' wi u tzijol ri caxa ri c'o wi ri c'ulwächinic, pa tak c'ut ri juyub re Jaar xkarik wi.

⁷ ¡Jo' jawije' ri cak'ijilax wi ri Dios! ¡Chujxucul chuwäch ri u tac'alibal ri e rakan!

⁸ Walij la, Ajawaxel, ruc' ri cuinelalaj caxa la pe ta la pa ri juyub ri cuxlan wi na la.

⁹ Ri e cojol tak tabal tok'ob la chquicojo' ri utzil chrij ri catz'iak; ri e jic ri e ech la chquiraka' qui chi' rumal ri quicotemal.

¹⁰ Rumal ri u tok'obisaxic u wäch ri David ri pataninel ech la, mesaj la u q'uixbal ri ajawinel ri cha'om la.

¹¹ Pa ri u bi', ri Ajawaxel co xutiq'uiba' che ri David jun chi'nic ri kas cäban na, jun chi'nic wa' ri man c'o ta u q'uextajic:

¹² “Quincoj na pa ri a tem re ajawibal jun chque ri e awija'lil. We ri e a c'ojol quequitz'akatisaj ri nu c'ulwächinic xukuje' ri e nu takanic ri quebentijoj chque, xukuje' ri e qui c'ojol ri e are' quet'uyi na pa ri a tem re ajawibal chbe k'ij sak.”

¹³ ¡Ri Ajawaxel u cha'om ri juyub Sion! ¡U c'utum rech chila' cajeki' wi!

¹⁴ “Are' juyub wa' ri quinwaj amak'el quinc'oji' wi; chi' quinjeki' wi are c'u wa' ri xkaj chnuwäch.

¹⁵ Sibalaj quintewichi'j na ri caquitijo, quinwesaj na ri qui wi'jal ri mebayib.

¹⁶ Ri e a cojol tabal tok'ob quincojo na colobal ib chrij ri catz'iak, quinban c'u na chi ri e jic chquixo'l caquirak na qui chi' rumal quicotemal.

¹⁷ Chila' quinban wi na chi catux chi wi na ri u cuinem ri David. Nu suc'umam chic jun chäj che ri ajawinel ri nu cha'om.

¹⁸ Ri e u c'ulel quinwesaj na nimalaj qui q'uixbal, are' c'u che ri are' quinya' na nimalaj u juluwem.”