Salmib 13 - Quiché Bible

Ch'awem ruc' Dios che u tz'onoxic to'banic

¹ Ajawaxel, ¿C'ä jampa' lo quinsach pa jolom la? ¿La kas xa c'u jumul quinsach pa jolom la? ¿C'ä jampa' lo cätakej na la u c'u'ic ib la chnuwäch?

² ¿C'ä jampa' ri nu c'aslibal xukuje' ri wanima' quecoch'on na xukuje' quebison na ronojel k'ij? ¿C'ä jampa' quinel chuxe' ri u takanic ri c'ulel?

³ Ajawaxel, nu Dios, ¡chinila' la, tzelej la u wäch ri nu tzij, che nojisaj la ri nu bak'wäch che ri chäj! ¡Ma ta chinkaj chupam ri waram re cämical!

⁴ Mubij ri nu c'ulel: “¡Nu ch'äcom!” Mäquicotic we quintzakic.

⁵ Ri in nu cu'bisam nu c'u'x pa ri tok'ob la; ri wanima' cäquicotic rumal rech chi quincol la.

⁶ ¡Quinbixoj ri Ajawaxel rumal ri utzil ri u banom chwe!