Salmib 127 - Quiché Bible

Ronojel cäpe ruc' ri Ajawaxel

¹ We man are' ri Ajawaxel cäyacow ri rachoch Dios, man c'o ta cupatanij ri qui chac ri e yacanelab; we man are' ri Ajawaxel cäch'ukuw ri tinimit, man c'o ta cupatanij pune' quec'asc'at ri chajinelab.

² Man c'o ta cupatanij cächaplex ri chac xuwi quel ulok ri k'ij c'ä cäkaj na ri k'ij cätijow c'u jun wa ri ch'äcon ruc' c'axc'olil, cuya' c'u ne' ri Dios chque ri e rachil pune' man caquesaj qui waram.

³ Ri e ka c'ojol ri quebalaxic, e je'lalaj tak u tewichibal ri Ajawaxel.

⁴ Ri e ka c'ojol ri quekalc'ualaj pa ri ka c'ojolal, e jacha' ch'ab pa u k'ab jun banal ch'o'j.

⁵ ¡Utz rech ri achi ri e c'o q'ui u ch'ab e je tak wa'! Man quesax ta na u q'uixbal cumal ri e u c'ulel aretak cuto' rib pa qui k'ab, chquiwäch tak ri k'atal tzij.