Salmib 126 - Quiché Bible

Bana' la chi cäq'uextaj ri ka cäkechbej

¹ Aretak ri Ajawaxel xuq'uex ri cärechbej ri Sion, je ta ne ri xa cätajin cujichiq'uic.

² Are' c'ut ri u pa ka chi' xukuje' tak ri e ka chi' xenoj che tak tze' xukuje' rakoj tak chi'aj re quicotemal; e are' c'ut ri e k'ijilal tak diosib caquibij: “¡Ri Ajawaxel e u banom nimak tak jastak chque!”

³ Je, ri Ajawaxel e u banom nimak tak jastak che ka to'ic, cujquicot c'ut.

⁴ ¡Ajawaxel, bana' la chi cuq'uex rib ri ka taklebem, jacha' ri u q'uextajic ri chaki'j uwo sak cumal ri jäb!

⁵ Ri queticonij ruc' u wa'l wächaj, cäquiyac na ri u wächinic ri ulew ruc' rakoj tak chi'aj re quicotemal.

⁶ Pune' quebok' che u c'amic bic ri ija', aretak quetzelej ulok quebixon chi ruc' quicotemal, e qui k'alum ulok jujun tak yataj trico.