Salmib 125 - Quiché Bible

Ri Dios quebuch'uk ri e rech

¹ Ri caquijiquiba' qui c'u'x chrij ri Ajawaxel man queslabetaj taj; quejunamataj ruc' ri juyub Sion, kas xa jumul e jekelic.

² Jacha' ri juyub quisutim rij ri Jerusalen, ri Ajawaxel u sutim rij ri u tinimit camic xukuje' amak'el.

³ Ri itzel k'atan tzij man amak'el tak cätakan cho ri ulew ri u yo'm ri Dios che ri u tinimit, muchaplej c'u ne' ri u tinimit u banic ri etzelal.

⁴ Ajawaxel, bana' la utzil chque ri e utzalaj tak winak, chque ri suc'um ri canima';

⁵ e are' c'u ri quebin pa ri itzel be bana' la chi je cäquitaklebej jas ri cäquitaklebej ri itzel tak winak. ¡Chc'ol c'u jamaril pa Israel!