Salmib 124 - Quiché Bible

Ri Dios, u Colonel ri Israel

¹ We ta ri Ajawaxel ma ta xc'oji' kuc' che u to'ic ka wi' —chubij c'u ri Israel camic—,

² we ta ri Ajawaxel ma ta xc'oji' kuc' che u to'ic ka wi' aretak xewalij ri winak che u banic c'ax chke,

³ uj c'asal ta ri' xujquibik'o aretak xnicow ri coyowal chkij.

⁴ Xujuc'am ta bic ri' ri ja'; ¡jun nima' ta ri' xoc'ow ta pakawi'!

⁵ ¡Xeboc'ow ta c'u ri' ri rekbala' pakawi'!

⁶ ¡Tewichital ri Ajawaxel, ri man xuya' ta chi xujquit'ub ta cuc' ri qui ware!

⁷ Xujel chuwäch ri c'amibal jacha' jun chicop ri e c'o u xic' ri man cäkaj ta pa u k'ab ri tzucunel; ri c'amibal xt'okopitajic, xujanimaj c'ut.

⁸ Ri to'bal kib cäpe ruc' ri Ajawaxel, ri xbanow ri caj xukuje' ri ulew.