Salmib 122 - Quiché Bible

U ya'ic u k'ij ri Jerusalen

¹ ¡Nimalaj quicotemal aretak cäbix chwe: “Jo' chupam ri rachoch ri Ajawaxel!”

² Jerusalen, ¡uj oquinak chic chquipam tak ri awoquibal!

³ Jerusalen, tinimit ri yacom rech quemulix ri tinimit winak chupam.

⁴ Chila' quebopan wi tak ri ramak' ri Ajawaxel che u k'ijilaxic ri u bi', jacha' ri takanic ri yo'm che ri Israel.

⁵ Chupam e c'o wi ri k'atbal tzij re suq'uil, ri k'atbal tak tzij re ri rachoch ri ajawinel David.

⁶ Chibij ruc' ronojel iwanima': “Chc'ol jamaril awuc', Jerusalen; ma ta c'o cäyo'w latz' chque ri catquilok'ok'ej.

⁷ Chc'ol jamaril pa tak ri e a tapia; ma ta c'o chc'ulmax chquipam tak ri nimak tak awachoch.”

⁸ Are c'u ri camic cumal ri e wachalal xukuje' ri e wachil quinbij na: “Chi chc'ol jamaril awuc'.

⁹ Rumal rech ri rachoch ri Ajawaxel, ri ka Dios, quintzucuj u banic utzil chawe.”