Salmib 119 - Quiché Bible

U ya'ic u k'ij ri u pixab ri Dios Alep

¹ Utz quech ri man c'o ta macaj pa ri qui c'aslemal, quiterenem c'ut ri u tijonic ri Ajawaxel.

² Sibalaj utz quech ri queboc il chque tak ri e u takanic cäquitzucuj c'ut ruc' ronojel canima',

³ ri man c'o ta jun etzelal caquibano, ri quitakem ri u be ri Ajawaxel.

⁴ Lal yo'm la takanic chi ri e pixab la ri e banom la kas chetz'akatisax qui banic.

⁵ ¡C'o ta banom wi co quinc'oji' pa ri qui nimaxic tak ri pixab la!

⁶ Ma ta c'u c'o jas quinq'uix wi na aretak chinoc il che qui nimaxic tak conojel ri e takomal la.

⁷ Quink'ijilan na che la ruc' ronojel wanima' ri man xak cawäch aretak e wetamam chic ri e suc'alaj tak pixab ri e tz'ibam.

⁸ ¡Quinwaj quebentz'akatisaj ri pixab la! ¡Minwonoba' c'u la canok!

Bet

⁹ ¿Jas lo cuban na ri c'ojol cacuinic caruc'aj jun ch'ajch'ojalaj u c'aslemal? ¡Rajawaxic cujunaj ri u c'aslemal ruc' ri tzij la!

¹⁰ Ri in quintzucun che la ruc' ronojel wanima'; maya' la c'olbal chi quintas ta wib chquij ri e takomal la.

¹¹ E nu c'olom tak ri tzij la chupam ri wanima'; rech man quinmacun ta chwäch la.

¹² ¡Lal tewichitalic, Ajawaxel! ¡Chintijoj la chque tak ri pixab la!

¹³ Cuc' ri nu chi' quebentzijoj na conojel tak ri pixab la ri e tz'ibam ri quebel chchi' la.

¹⁴ Quinquicot na pa ri qui be ri e takomal la chquiwäch conojel ri k'inomal.

¹⁵ E are quebenchomaj na tak ri pixab la ri e tz'ibatalic. Quinoc na il che qui ternexic ri be la.

¹⁶ Quinquicot na cuc' tak ri pixab la, man quesach ta ri tzij la pa nu jolom.

Jimel

¹⁷ ¡Chya' la u c'aslemal we pataninel ech la ri'! ¡Quinnimaj na ri tzij la!

¹⁸ Chejaka' la ri nu bak'wäch, quebenwil c'u na ri e u mayibal ri tijonic la.

¹⁹ Ri in man etamatal ta nu wäch cho ri uwächulew mec'u' ba' la ri e takomal la chnuwäch.

²⁰ Ronojel k'ij quinel ch'u'j che retamaxic ri chomam la qui banic.

²¹ Ri lal cak'atij la qui wäch ri e banal tak nimal xukuje' ri e c'okotajinak, ri cäquitas quib chquij tak ri e takomal la.

²² Chinesaj la chquiwäch tak ri qui c'axc'obisanic xukuje' ri quetzelam tak wächaj.

²³ Winak c'ut c'o qui cuinem cäquichomaj u banic c'ax chwe, we pataninel ech la ri' cächoman chquij tak ri pixab la.

²⁴ Ri in quinquicot cuc' tak ri e takanic la; e are' tak ri e ya'l nu no'j.

Dalet

²⁵ Camem quinbano; ¡chya' la nu c'aslemal, jas ri u cholajil ri chi'nic la!

²⁶ Nu k'alajisam ri nu c'aslemal chwäch la, xtzelej c'u la u wäch ri nu tzij; ¡chintijoj la chque tak ri pixab la!

²⁷ Chya' la nu chomabal che qui takexic ri e pixab la ri e tz'ibatalic, quinwaj c'ut quinchoman chquij tak ri mayibal la.

²⁸ In jik'inak chquipam tak ri e u wa'l wächaj re k'oxomal; ¡bana' ba' la chi co quinc'ojic jas ri u cholajil ri chi'nic la!

²⁹ Chinnajtajisaj la che ri be re ri banoj tzij, chtok'obisaj la nu wäch rumal ri tijonic la.

³⁰ Nu cha'om ri be rech ri kastzij, quebenrayij c'ut ri e chomam la qui banic.

³¹ Ajawaxel, benak wanima' chquij ri e takanic la; mesaj la nu q'uixbal.

³² Quincowij qui tz'akatisaxic ri e takomal la canojisaj c'u la ri wanima' che quicotemal.

Je

³³ Ajawaxel, c'utu' la ri qui be tak ri pixab la chnuwäch, quinwaj quebenterenej c'ä chuq'uisbalil.

³⁴ Chya' la nu chomabal che u c'olic ri tijonic la; ¡quinwaj quinnimaj ruc' ronojel wanima'!

³⁵ Chinc'ama' la bic chquipam tak ri qui be tak ri takomal la, chquipam c'ut c'o wi ri nimalaj utzil chwe.

³⁶ Bana' la chi are cäbe wanima' chque tak ri takanic la ma ta chque ri ch'äcoj ruc' subunic.

³⁷ Mäya' la chi cäbe nu wäch chque tak ri diosib ri e subunelab; chäya' la nu c'aslemal che u takexic ri be la.

³⁸ Chetz'akatisaj la ri e chi'nic la che we pataninel ech la ri' ri queban la chque ri caquina' quib chwäch la.

³⁹ Najtajisaj la chwe ri c'axc'obisanic ri quinna' wib chuwäch, e utz c'ut ri pixab la ri e tz'ibam la.

⁴⁰ E nu rayim ri pixab la ri e tz'ibatalic; ¡chya' la nu c'aslemal, lal c'u ya' suc'!

Bau

⁴¹ Ajawaxel, c'utu' la ri lok'ok'ebal c'u'x la chnuwäch xukuje' ri colonic la, je jacha' ri chi'm la.

⁴² Jeri' quincuinic quinc'ulelaj ri quinc'axc'obenic, nu cuban c'u nu c'u'x chrij ri tzij la.

⁴³ Mesaj la pa nu chi' ri tzij aj kastzij, nu yo'm c'u ri weyebal c'u'x chquij ri pixab ri e tz'ibatalic.

⁴⁴ ¡Quinwaj quinnimaj u banic ri tijonic la, amak'el, chbe k'ij sak!

⁴⁵ Jeri' quincuinic quinc'oji' pa torotajic, e nu terenem c'u ri takanic la.

⁴⁶ Quebentzijoj na ri takanic la chquiwäch tak ri ajawinelab, man quinna' ta c'u na q'uixbal.

⁴⁷ Quebenlok'oj c'u ri takanic la xukuje' quinquicot cuc'.

⁴⁸ Quebenlok'ok'ej xukuje' quebenrayij tak ri e takomal la, sibalaj c'u quinchomaj quij ri pixab la.

Zayin

⁴⁹ Chnataj ri tzij la ri xya' la che we pataninel ech la ri': ri xban wi la xincoj ri weyebal c'uxaj che.

⁵⁰ Are c'ulbal nu c'u'x wa' pa ri bis: chi cumal tak ri chi'nic la caya' la nu c'aslemal.

⁵¹ Ri c'ulelanelab man quetani' ta che nu yok'ic, man quintas ta c'u wib chrij ri tijonic la.

⁵² Quenataj chwe ri pixab ri xetz'ibaj la canok chquipam jujun tak k'ijol canok, chquipam c'u wa', Ajawaxel, quinrik wi cu'bisabal c'uxaj.

⁵³ Ri e banal tak etzelal ri cäquixutuj ri tijonic la, cäquiyac woyowal.

⁵⁴ Ri pixab la e are uxinak tak nu bix chupam we ulew ri' ri wokxanim wi wib.

⁵⁵ Ajawaxel, aretak coc ak'ab cänataj la chwe; ¡quinwaj quinoc che qui nimaxic ri tijonic la!

⁵⁶ Are wa' ri takal u banic wumal: ri qui nimaxic ri yo'm la qui bixic.

Chet

⁵⁷ Lal ri wechbal, Ajawaxel, lal ronojel ri c'o wuc'; nu chi'm qui nimaxic tak ri e tzij la.

⁵⁸ Ruc' ronojel wanima' nu cojom nu chuk'ab rech utz quinil la; bana' ba' la utzil chwe jas ri u cholajil ri chi'm la.

⁵⁹ Xinoc che u chomaxic ri nu c'aslemal, xintzelej chi c'u jumul che qui nimaxic tak ri e takanic la.

⁶⁰ Wanextam c'ut, man xinbey ta wib che qui nimaxic tak ri e takomal la.

⁶¹ Ri banal tak etzelal qui sutim wij cuc' tak c'amibal, man elinak ta c'u ri tijonic la pa nu jolom.

⁶² Pa niq'uiaj ak'ab quinwalij che u ya'ic maltioxinic che la, cumal ri suc'alaj tak chomanic ri e banom la.

⁶³ In e wachil ri' ri caquiya' k'ij la xukuje' cuc' ri quequitz'akatisaj tak ri pixab la ri e tz'ibatalic.

⁶⁴ Ajawaxel, ri uwächulew nojinak che ri lok'ok'ebal c'u'x la, ¡chintijoj la chque tak ri pixab la!

Tet

⁶⁵ Ajawaxel, banom la utzil ruc' we pataninel ech la ri' jas ri u cholajil ri chi'nic la.

⁶⁶ Chintijoj la rech cäc'oji' utzalaj nu chomanic xukuje' wetamanic, nu jiquibam c'u nu c'u'x chquij tak ri e takomal la.

⁶⁷ Aretak maja' cäc'äjisax nu wäch, xebenban q'ui sachinakil, are c'u ri camic quinnimaj ri tzij la.

⁶⁸ Ri lal, lal utz, caban c'u la ri utzil; ¡chintijoj la chque tak ri pixab la!

⁶⁹ Ri e banoj nimal e nimol tak quib cäquiyac jalum k'abam chwij, Are c'u ri in ruc' ronojel wanima' quebentz'akatisaj ri pixab la ri e tz'ibatalic.

⁷⁰ Ri e are' e tz'apital ri quetamanic, are c'u ri in quinquicot ruc' ri tijonic la.

⁷¹ Utz xuban chwe chi xc'äjisaj la nu wäch, rumal rech wa' xebenwetamaj tak ri pixab la.

⁷² Chwe in are nim na u k'ij ri tijonic ri quel chi chi' la, chquiwäch ri joropa' mil k'an puak xukuje' sak puak.

Yod

⁷³ Ri lal xinbanow la kas xinbit c'u la; ¡ya' la nu c'oxomanic rech quintijotaj che qui banic tak ri e takomal la!

⁷⁴ Jachin tak ri nim quilow la quequicot na aretak quinquilo, rumal rech chi nu yo'm ri weyebal c'uxaj chrij ri tzij la.

⁷⁵ Ajawaxel, in weta'm chi ri pixab la ri e tz'ibam la e suc', chi c'o c'u rumal cäc'äjisaj la nu wäch.

⁷⁶ ¡Chi ri lok'ok'ebal c'u'x la chajwataj chwe che cu'bisabal nu c'u'x, jas ri u cholajil ri chi'nic ri xban la chwe!

⁷⁷ C'utu' ri ch'uch'ujil la chnuwäch, bana' c'u la chwe chi quinc'asi'c, quinna' c'u wib chi utz in c'olic rumal ri tijonic la.

⁷⁸ Chel qui q'uixbal ri e banal tak nimal ri man c'o ta jasche c'ax quech'aw chwe; in quinwaj quebenchomaj tak na ri e takomal la.

⁷⁹ Chquimulij quib wuc' ri caquiya' k'ij la, ri queta'm tak ri takanic la.

⁸⁰ Chi ri wanima' chux tz'akat pa tak ri pixab la, rech man c'o ta jas quinq'uix ta wi na.

Cap

⁸¹ Ruc' nimalaj rayinic weye'm chi quincol la; ¡nu yo'm c'ut ri weyebal nu c'u'x chrij ri tzij la!

⁸² Quetzaj ri nu bak'wäch, weye'm ri chi'nic la; quinbij c'ut: “¿Jampa' ri cäpe la che u cu'bisaxic nu c'u'x?”

⁸³ Pune' c'u in jun ri'j ri man c'o ta chi cajwataj wi ri man cänatax ta chic, man c'u e sachinak ta ri e pixab la pa nu jolom.

⁸⁴ ¿Joropa' lo k'ij quinweyej chi na? ¿Jampa' cäk'at la tzij paquiwi' ri in quiterenem pa wakan?

⁸⁵ Winak ri e nimol quib, ri man caquitakej ta ri tijonic la, qui c'otom ri nu jul tak pa ri quinmuk wi.

⁸⁶ ¡Chinto' la in terenetal c'u pa wakan man c'o ta jasche! ¡Ri e takomal la conojel e kastzij!

⁸⁷ Xa jubik' man cäsach nu wäch cho ri ulew, ma ta c'u ne ma ta in oquinak il chque ri pixab la ri e tz'ibam la.

⁸⁸ Chäya' la nu c'aslemal je jas ri cuc'ut ri lok'ok'ebal c'u'x la, quinoc c'u na che qui nimaxic ri e takanic la ri e elinak chichi' la.

Lamed

⁸⁹ Ajawaxel, ri tzij la junalic; ¡co jekebam pa ri caj!

⁹⁰ Ri kastzij la cajeki' amak'el; lal c'u xtac'aban la ri ulew, co c'u xcanajic.

⁹¹ Conojel ri jastak co e takeninak, jas ri qui cholajil ri pixab la ri e tz'ibam la.

⁹² We ta ri tijonic la ma ta cuc'am ulok quicotemal chwe, ri bis u q'uisom ta tzij ri' panuwi'.

⁹³ Mawi c'u jubik' quel ta pa nu jolom ri pixab la ri e tz'ibatalic, rumal c'u quech wa' yo'm la nu c'aslemal.

⁹⁴ ¡Chincolo' la, in ech c'u la, e nu terenem c'ut ri pixab la ri e tz'ibatalic!

⁹⁵ Ri e banal tak etzelal xak queyem jampa' quecuin che nu cämisaxic, are c'u ri in in oquinak il chque tak ri takanic la.

⁹⁶ Wilom chi conojel ri jastak c'o qui q'uistajic, e are c'u tak ri takomal la man c'o ta qui q'uistajic.

Mem

⁹⁷ ¡Sibalaj quinlok'ok'ej ri tijonic la! ¡Ronojel ri jun k'ij quinchoman chrij!

⁹⁸ Ri e takomal tak la e wech chbe k'ij sak; qui banom na aj no'j chwe chquiwäch ri qui banom qui c'ulel chwe.

⁹⁹ C'o na ri quinch'ob na chquiwäch conojel ri wajtijab, rumal chi sibalaj quinchoman chquij tak ri e takanic la.

¹⁰⁰ C'o ri quinch'ob na chquiwäch ri ri'jab tak tatayib rumal rech chi e nu nimam tak ri pixab la ri e tz'ibatalic.

¹⁰¹ E nu najtajisam ri wakan che ronojel itzel be rech quintz'akatisaj ri tzij la.

¹⁰² Man nu tasom ta wib chquij tak ri pixab la ri e tz'ibatal umal la lal chi c'ut ri quintijon la.

¹⁰³ Ri chi'm la c'o na ri u qui'al pa nu chi', chuwäch ri juyubal räx cab pa nu chi'.

¹⁰⁴ Chque tak ri e tz'ibatal umal la wesam wi etamanic; rumal ri' quinwetzelaj u wäch ronojel subunelalaj c'aslemal.

Nun

¹⁰⁵ Ri tzij la are' jun chäj chque ri wakan, are jun sakil pa ri nu be.

¹⁰⁶ Xinban jun chi'nic ri kas cäban na, quintz'akatisaj c'ut: ¡quebenbana' ri caquibij ri e suc'alaj tak colomibal la!

¹⁰⁷ Ajawaxel, quinna' wib chi sibalaj in ch'ibatajinak; ¡chya' la nu c'aslemal, je jas ri chi'nic la!

¹⁰⁸ Chec'amowaj la, Ajawaxel, ri sipanic que ri nu chi', chintijoj la chque ri pixab la.

¹⁰⁹ Amak'el xak quieb xubij ri cämical panuwi', man elinak ta c'u ri tijonic la pa nu jolom.

¹¹⁰ Ri e banal tak etzelal quequicoj c'amibal pa nu be, man quintas ta c'u wib chquij ri e tz'ibatalic la.

¹¹¹ Ri junalic wechbal e are' ri takomal la, e are' c'u quequicotesan ri wanima'.

¹¹² Ruc' ronojel wanima' e nu yo'm nu tzij che qui banic ri caquibij ri e pixab la, xa jumul chbe k'ij sak.

Samec

¹¹³ Quinwetzelaj qui wäch ri winak ri quieb qui wäch, quinlok'ok'ej c'u ri tijonic la.

¹¹⁴ Lal quintok'en la xukuje' nu ch'ukubal wib; nu yo'm c'ut ri weyebal c'u'x chrij ri tzij la.

¹¹⁵ ¡Chinajtajisaj iwib chwe, banal tak etzelal, quinwaj c'ut quebentz'akatisaj ri e u takomal ri nu Dios!

¹¹⁶ Chya' la nu chuk'ab, je jas ri chi'm la, quinc'asi' c'u na; ¡mak'ip la ri weyebal c'uxaj!

¹¹⁷ Chinto' la, quinel c'u na chupam ri latz'; jeri' amak'el quebentz'akatisaj na ri pixab la.

¹¹⁸ Lal quetzelaj la qui wäch ri cäquitas quib chquij ri pixab la, rumal rech chi man c'o ta u beya'l ri qui chomanic.

¹¹⁹ Ri e banal tak etzelal ri e c'o cho ri uwächulew xa e mes chwäch la; rumal ri' quebenlok'oj ri e takomal la.

¹²⁰ Cäbirbit ri nu cuerp rumal xe'n ib chwäch la; ¡nim quebenwil wi ri pixab la!

Ayin

¹²¹ Mawi jubik' nu tanabam u banic jachique ri suc'; minwonoba' la can pa qui k'ab ri quebanow c'ax chwe.

¹²² Cheklej la ri u banic utzil chwe; minquiyok' ri e nimol tak quib.

¹²³ Quechup ri nu bak'wäch, weye'm chi quincol la; weye'm chi quinto' la je jas ri chi'm la.

¹²⁴ Je bana' la che we pataninel ech la ri' je jas ri lok'ok'ebal c'u'x la; ¡chintijoj la chque ri pixab la!

¹²⁵ Ri in in pataninel ech la. Chya' la wetamanic, quinwaj c'ut quinwetamaj tak ri e takanic la.

¹²⁶ Ajawaxel, opaninak ri k'ijol chi c'o jas caban la, man e qui nimam ta c'ut ri e tijonic la.

¹²⁷ Rumal ri' ri in e are' quebenlok'ok'ej na ri e takomal la chuwäch ri utzalaj tak k'an puak.

¹²⁸ Rumal ri' e nu c'ojom ri e tz'ibatal umal la che c'amal nu be, quinwetzelaj c'u u wäch apachique subunelalaj c'aslemal.

Pe

¹²⁹ Ri e takanic la e mayibal; rumal ri' quebennimaj.

¹³⁰ Ri qui quiric ri tzij la caquiya' tununic, cutijoj ri winak ri man c'o ta retamanic.

¹³¹ Ruc' nimalaj rayinic quinjak ri nu chi; sibalaj c'u quebenrayij ri e takomal la.

¹³² Chiwila' la, chel c'u'x la chwe, jas ri cäban la chque ri quelok'ok'ej la.

¹³³ Chc'ama' la nu be je jas ri cubij ri tzij la; maya' la be chi quinkajbex rumal ri etzelal.

¹³⁴ Chinesaj la chuwäch ri tokinic aj winak, quinwaj c'ut quebentz'akatisaj ri pixab la ri e tz'ibatal umal la.

¹³⁵ Utz rilic we pataninel ech la ri' bana' la; chintijoj c'u la chque tak ri pixab la.

¹³⁶ Nima' quech u wa'l wächaj queturuw tak chque ri nu bak'wäch, rumal rech chi man nim ta quil wi ri tijonic la.

Tzade

¹³⁷ Ajawaxel, ri lal lal suc'; e colom c'ut ri pixab tak la ri e tz'ibam la.

¹³⁸ Conojel tak ri takanic la e suc' xukuje' e kastzij.

¹³⁹ In oyowinak rumal quech ri nu c'ulel chi man cäquita'taj ri tzij la.

¹⁴⁰ Ri chi'nic la oc'owinak chquipam c'axalaj tak c'ambejenic, rumal ri' cälok'ok'ex rumal we pataninel ech la ri'.

¹⁴¹ Man c'o ta nu banic, xukuje' man c'o ta nu sachom ta ri e pixab la nu patan ri e tz'ibatalic.

¹⁴² Ri suq'uil la amak'el suc' wi, ri tijonic la are kastzij.

¹⁴³ In kajinak pa c'axc'olil xukuje' chquipam tak latz'obibal, e are tak c'ut ri e takomal la xinquicotisaj.

¹⁴⁴ Ri e takanic la amak'el e suc'; ¡chya' la wetamanic rech quincuinic quinc'asi'c!

Cop

¹⁴⁵ Ajawaxel, quinsiq'uin che la ruc' ronojel wanima', ¡tzelej la ulok u wäch ri nu tzij quinwaj c'ut quebentz'akatisaj tak ri pixab la!

¹⁴⁶ Che la quintz'onoj wi to'banic; chinto' la, rech quebennimaj tak ri takanic la.

¹⁴⁷ C'ämajok chi sakarok, quinwalij che u tz'onoxic ri to'banic la, nu cojom ri weyebal c'u'x chrij ri chi'nic la.

¹⁴⁸ C'ämajok choc ri ak'ab ri e nu bak'wäch e c'asc'atinak chi apanok che u chomaxic ri chi'nic la.

¹⁴⁹ Chtatabej la ri nu ch'abal, Ajawaxel, rumal ri lok'ok'ebal c'u'x la; chya' la nu c'aslemal jas ri u cholajil ri suq'uil la.

¹⁵⁰ Nakaj e c'o wi ri e are' cäcaj caquiban c'ax chwe ri man e tok'obisal ta wächaj, naj c'u e c'o wi che ri tijonic la.

¹⁵¹ Ri lal Ajawaxel nakaj lal c'o wi, conojel c'u ri e takomal la kas e kastzij.

¹⁵² Kas ojer ulok wetamam qui wäch ri e takanic la, ri e jekebam la chbe k'ij sak.

Rex

¹⁵³ Chila la ri nu c'axc'obic, chinto'tajisaj c'u la, man elinak ta c'u ri tijonic la pa nu jolom.

¹⁵⁴ Chto' la nu wi', chintoro' la; ¡ya' la nu c'aslemal jas ri chi'nic la!

¹⁵⁵ Ri to'banic la naj c'o wi chque ri e banal tak etzelal, rumal rech chi man quiterenem ta ri pixab la.

¹⁵⁶ Ajawaxel, sibalaj nim ri ch'uch'ujil la; chya' la nu c'aslemal je jas ri u cholajil ri suq'uil la.

¹⁵⁷ Sibalaj e q'ui ri e nu c'ulel xukuje' ri e banal tak c'ax chwe, are c'u ri in man quintas ta wib chquij tak ri e takanic la.

¹⁵⁸ Man quebencoch' ta ri man e jic taj, man c'u quebequinimaj ta ri e takomal la.

¹⁵⁹ Ajawaxel, chila la chi sibalaj quinlok'ok'ej ri pixab la ri e banom la; ¡chya' la nu c'aslemal, rumal ri lok'ok'ebal c'u'x la!

¹⁶⁰ Chupam ri tzij la c'o wi ri kastzij; ri e junalic e suc' conojel tak ri e tz'ibatal umal la.

Sin

¹⁶¹ Winak ri c'o qui cuinem quinquiterenej pa wakan man c'o ta c'u jasche, are c'u ri wanima' cuya' u k'ij tak ri tzij la.

¹⁶² In quina' wib chi sibalaj utz wech rumal ri chi'nic la, je ta ne' jachin curik jun nimalaj k'inomal.

¹⁶³ Quinwetzelaj u wäch ri banoj tzij, man quincoch' taj; quebenlok'ok'ej c'ut ri tijonic la.

¹⁶⁴ Amak'el quink'ijilan che la rumal quech ri e suc'alaj tak pixab la.

¹⁶⁵ Ri quelok'ok'en ri tijonic la, cäquirik nimalaj jamaril, man c'o ta c'u cabanowic chi quetzakic.

¹⁶⁶ Ajawaxel, quinweyej chi quincol la, e nu takem c'u qui nimaxic tak ri e takomal la.

¹⁶⁷ In quebennimaj ri takanic la, quebenlok'ok'ej c'ut ruc' ronojel wanima'.

¹⁶⁸ In quebennimaj tak ri pixab la ri e tz'ibatalic xukuje' tak ri takanic la; ¡lal eta'm la ronojel ri nu c'aslemal!

Tau

¹⁶⁹ Chebopan ri nu rakoj tak chi'aj chwäch la Ajawaxel; ¡chya' la wetamanic je jas ri u cholajil ri tzij la!

¹⁷⁰ Chopan ri nu ch'awem chwäch la; ¡chinto'tajisaj la je jas ri u cholajil ri chi'nic la!

¹⁷¹ Chq'uiy ulok ri k'ijilanic chi nu chi', in tijom c'u la chque tak ri pixab la.

¹⁷² Ri e nu chi' chquibixoj jun bix che ri chi'nic la, conojel c'ut ri e takomal la e suc'.

¹⁷³ Xak cheyen ri k'ab la che u ya'ic to'banic chwe, are c'u benak wanima' chque ri pixab la ri e tz'ibatalic.

¹⁷⁴ Ajawaxel, ¡quinrayij chi quinto'tajisaj la! ¡In quinna' wib chi sibalaj utz wech rumal ri tijonic la!

¹⁷⁵ Quinwaj chi quinc'asi' che u ya'ic k'ij la; chinuto' ba' ri suq'uilal la.

¹⁷⁶ Nu jalon nu be jacha' jun chij; ¡petba' la che nu tzucuxic, man c'u e sachinak ta ri e takomal la pa nu jolom!