Salmib 118 - Quiché Bible

Ri u cuinem ri Ajawaxel man c'o ta cajunamataj ta wi

¹ Chiya' maltioxinic che ri Ajawaxel, rumal rech chi utz ri are'; rumal rech chi ri lok'ok'ebal u c'u'x junalic.

² Chquibij ri aj israelib: “Ri lok'ok'ebal u c'u'x ri Ajawaxel junalic.”

³ Chquibij ri e cojol tabal tak tok'ob: “Ri lok'ok'ebal u c'u'x ri Ajawaxel junalic.”

⁴ Chquibij ri queyo'w u k'ij ri Ajawaxel: “Ri lok'ok'ebal u c'u'x ri Ajawaxel junalic.”

⁵ Pa ri nu c'axc'obic xinsiq'uij ri Ajawaxel; ri are' xinutatabej, xuya' c'u ri nu torotajic.

⁶ Ri Ajawaxel c'o wuc'; man quinxe'j ta wib. ¿Jas ta ri cäcuin ri winak cuban ta chwe?

⁷ Ri Ajawaxel c'o wuc'; are' cäyo'w to'banic chwe. ¡Quinwil na aretak quech'äctaj ri cäquetzelaj nu wäch!

⁸ Are utz na ri u jiquibaxic c'uxaj chrij ri Ajawaxel chuwäch ri u jiquibaxic c'uxaj chrij ri winak.

⁹ Are utz na ri u jiquibaxic c'uxaj chrij ri Ajawaxel chuwäch ri u jiquibaxic c'uxaj chquij winak ri nimak qui k'ij.

¹⁰ Conojel ri nimak tak tinimit xquisutij wij, pa ri u bi' c'u ri Ajawaxel xebench'äco.

¹¹ Xquisutij wij pa ronojel c'olbal, pa ri u bi' c'u ri Ajawaxel xebench'äco.

¹² Xquisutij wij e jacha' ta ne sita'l, xchup c'u ri coyowal jacha' k'ak' quech q'uix; pa ri u bi' ri Ajawaxel xebench'äco.

¹³ Xinquich'icmij ruc' chuk'ab rech quintzakic, xpe c'u ri Ajawaxel che nu to'ic.

¹⁴ In quinbixon che ri Ajawaxel, ri cäyo'w nu chuk'ab; are' nu colonel.

¹⁵ Pa tak ri cachoch ri e jic winak e c'o quicotemal tak bix re ch'äcanic: “Ri u cuinem ri Ajawaxel xyo'w ri ch'äcanic.

¹⁶ ¡Ri u cuinem ri Ajawaxel man c'o ta cäjunamataj ta wi! ¡Ri u cuinem ri Ajawaxel xyo'w ri ch'äcanic!”

¹⁷ ¡Man quincäm ta na, xane' quinc'asi' na, che u tzijoxic ri u banom ri Ajawaxel!

¹⁸ Ri Ajawaxel u c'äjisam nu wäch ruc' c'anal, man in u jachom ta c'u pa u k'ab ri cämical.

¹⁹ ¡Chebijaka' ri roquibal ri rachoch Dios, quinwaj quinoc chupam che u ya'ic maltioxinic che ri Ajawaxel!

²⁰ Are oquibal wa' ri coc wi na ri Ajawaxel, chi' c'u queboc wi na ri e jic.

²¹ Quinya' maltioxinic che la, Ajawaxel, rumal chi tzelem la u wäch nu tzij, xukuje' chi lal nu colonel.

²² Ri abaj ri xetzelax u wäch cumal ri e banal tak ja, are c'u uxinak ri abaj ri nim na u patan.

²³ Wa' are' banowinak ri Ajawaxel uj c'u mayininak.

²⁴ Are k'ij wa' ri u banom ri Ajawaxel: chujajatok chujquicot pa ri are'.

²⁵ Bana' la tok'ob Ajawaxel, chujcolo' la. Bana' la tok'ob Ajawaxel, ¡bana' la chi utz cujelic!

²⁶ ¡Tewichital ri cäpe pa ri u bi' ri Ajawaxel! Quixkatewichi'j ulok kas chupam ri rachoch ri Ajawaxel.

²⁷ Ri Ajawaxel are' Dios; ¡are' cujtunanic! Chichaplej ri nimak'ij, chebic'ama' bic qui k'ab tak che' c'ä cuc' tak ri ruc'a' ri porobal.

²⁸ Quinmaltioxin che la quinya' c'ut u k'ij ri nimalil la, lal c'ut ri nu Dios.

²⁹ Chebiya' maltioxinic che ri Ajawaxel, rumal rech chi utz ri are'; rumal rech chi ri lok'ok'ebal u c'u'x junalic.