Salmib 116 - Quiché Bible

Ch'awem ruc' Dios re maltioxinic

¹ Quinlok'ok'ej ri Ajawaxel xutatabej c'ut ri nu bochi'nic,

² u yo'm c'ut ri u xiquin che nu tatabexic. ¡Pa ronojel ri nu c'aslemal quinnataj na ri u bi'!

³ Ri cämical xinuralij chquipam tak ri u colob; ri u c'axc'olil ri mukubal xinuriko, xinximitaj rumal ri xe'n ib xukuje' ri k'oxomal.

⁴ Xinnataj c'u ri u bi' ri Ajawaxel xinta' tok'ob che chi cucol ri nu c'aslemal.

⁵ Ri Ajawaxel suc' xukuje' quel u c'u'x; ri ka Dios ch'uch'uj pa ronojel.

⁶ Ri Ajawaxel quebuchajij ri man cäquiban ta nimal. Ri in aretak man c'o ta chi nu chuk'ab, xinuto'.

⁷ Camic, quinna' chi utz chic in c'olic, rumal chi ri Ajawaxel u banom utz wuc'.

⁸ Xinresaj pa u k'ab ri cämical, xinresaj pa ri ok'ej, man xintzak ta c'ut.

⁹ Quinux na nimanel che ri Ajawaxel chquixo'l ri e c'asc'oj.

¹⁰ Ri in c'o nu cojonic, pune' c'u xinbij chi sibalaj c'ax ri nu rikom.

¹¹ Q'uistajinak nu c'u'x, xinjiquiba' u bixic chi ronojel winak banal tzij.

¹² ¿Jas quinban che u tojic che ri Ajawaxel ronojel ri utzil ri u banom wuc'?

¹³ Quinwalijisaj na ri kumubal re ri colobal ib quinnataj c'u na ri u bi'.

¹⁴ Quebentz'akatisaj na ri xinchi'j che ri Ajawaxel chuwäch ronojel ri u tinimit.

¹⁵ Sibalaj c'ax cuna' ri Ajawaxel aretak querilo quecäm ri quelok'ok'enic.

¹⁶ ¡Oh Ajawaxel, in pataninel ech la! ¡In ral ri ixok ri pataninel ech la! Ri lal xt'okopij la ri colob ri in ximowinak.

¹⁷ Che u ya'ic ri maltioxinic quebenya' na tabal tak tok'ob chwäch la, xukuje' quinnataj na ri bi' la, Ajawaxel.

¹⁸ Quebentz'akatisaj na ri xinchi'j che ri Ajawaxel chuwäch ronojel ri u tinimit,

¹⁹ chquiwäch ri e uwo rachoch ri Ajawaxel, pa a niq'uiajil, Jerusalen. ¡Chyo'k u k'ij ri Ajawaxel!