Salmib 115 - Quiché Bible

Ri ka Dios c'o pa ri caj

¹ Ajawaxel, chya' k'ij la chbil ib la, ma ta are' ri uj; ¡chnimarisaj k'ij la, rumal ri lok'ok'ebal c'u'x la xukuje' ri kastzij la!

² ¿Jas ta che caquiban c'otoj chi'aj ri e k'ijilal tak diosib, jawije' c'o wi ri ka Dios?

³ Ri ka Dios c'o pa ri caj; ri are' u banom ronojel ri xraj.

⁴ Ri e qui diosib ri winak e re k'an puak xukuje' sak puak, e jastak ri e qui banom ri winak cuc' tak ri qui k'ab:

⁵ C'o qui chi', man c'u quecuin taj quech'awic; c'o qui bak'wäch, man c'u quecuin taj queca'yic;

⁶ c'o qui xiquin, man c'u quecuin taj quetanic; c'o qui tza'm, man c'u quecuin taj quesikonic;

⁷ c'o qui k'ab, man c'u quecuin taj quenakan cuc' ri qui k'ab; c'o cakan, man c'u quecuin taj quebinic; ¡Man c'o ta jun tzij quel ta pa qui chi'!

⁸ Ri xebanowic xak e junam cuc' we diosib ri', xukuje' ri quecojon chque.

⁹ Aj israelib tak, ¡chicu'ba' i c'u'x chrij ri Ajawaxel! Ri Are' cujuto' xukuje' cujuch'uku.

¹⁰ Cojol tak tabal tok'ob, ¡chicu'ba' i c'u'x chrij ri Ajawaxel! Are' cujto'wic xukuje' cujuch'uku.

¹¹ Ix ri nim quiwil wi ri Ajawaxel, ¡chijiquiba' i c'u'x chrij! Ri are' cujuto' xukuje cujuch'uku.

¹² ¡Ri Ajawaxel uj natal che cujutewichi'j c'u na! Quebutewichi'j na ri aj israelib, quebutewichi'j na ri e cojol tabal tok'ob.

¹³ Quebutewichi'j na ri queyo'w u k'ij, chi nimak chi ch'utik.

¹⁴ ¡Chi ri Ajawaxel chebupok'isaj ri e iwija'lil xukuje' ri e quech ri e i c'ojol!

¹⁵ ¡Ri Ajawaxel, ri xbanow ri caj ulew, chuya' ri u tewichibal chiwe!

¹⁶ Ri caj rech ri Ajawaxel, xuya' c'u ri ulew che ri winak.

¹⁷ Ri e kajinak chi bic chupam ri ulew re ri yinelem, ri e cäminak chic, man quecuin ta chic cäquiya' u k'ij ri Ajawaxel;

¹⁸ are c'u ri uj cäkak'ijilaj na camic c'ä chbe k'ij sak. ¡Chyo'k u k'ij ri Ajawaxel!