Salmib 112 - Quiché Bible

Ri curik na ri winak ri tz'akatisanel pa ronojel

¹ ¡Chyo'k u k'ij ri Ajawaxel! Utz rech ri winak ri tz'akat pa ronojel ruc' ri Ajawaxel che qui nimaxic ri e u takomal.

² Ri e rija'lil ri winak ri tz'akatisanel pa ronojel quetewichitaj na, cäc'oji' na qui cuinem cho ri uwächulew.

³ Chupam ri rachoch c'o telechi'm k'inomal, amak'el c'ut cäyanic.

⁴ Junam ruc' jun chäj pa ri k'ekumalil, ri cäjuluw chque ri winak ri e tz'akatisanelab pa ronojel. Tok'obisal wächaj ch'uch'uj, xukuje' suc';

⁵ ri winak ri utz c'olic man cuban ta quieb u c'u'x cuya' kajomal, suc'um ri u takanic paquiwi' ri jastak rech.

⁶ Rumal ri' mawi jubik' quetzakok. ¡Ri suc'alaj winak amak'el cänatax na!

⁷ Man cuxe'j ta rib chque ri itzel tak jastak ri quetzijoxic; co jekel ri ranima', u cuban u c'u'x chrij ri Ajawaxel.

⁸ Co jekel ri ranima', man cuxe'j ta rib, cutze'j c'u ne' qui wäch ri e u c'ulel.

⁹ Cujach cochij chque ri mebayib, amak'el cayanic, cuwalijisaj ri u palaj ruc' nim ilic.

¹⁰ Ri banal etzelal cäpe royowal aretak cäril u wäch; man cäcuin taj c'o jas cubano xuwi cukuch'uch'ej ri u ware. Ri itzel qui rayinic ri e banal tak etzelal man je ta quel wi na.